Në Prokurorinë e Posaçme (SPAK) ka shkuar sot Agim Deda, vëllai tjetër i protestuesit të vrarë më 21 janar 2011, Hekuran Deda.
Teksa doli nga institucioni ai refuzoi të jepte deklaratë para mediave, duke preferuar të kalonte në heshtje pasi përfundoi dëshminë në SPAK.
Ditën e djeshme u paraqit për të dëshmuar Zabit Deda i cili tha para mediave se kishte dhënë të gjithë informacionet që i kishin kërkuar prokurorët e posaçem. Ai u shpreh se kishte besim që SPAK do të zbardhte të gjithë ngjarjen e rëndë që shkaktoi 4 protestues të vrarë para kryeministrisë.
Në ditët në vijim pritet që në SPAK të paraqiten edhe ish-zyrtarë të tjerë që mund të kenë dhënë urdhër për zjarr luftarak kundrejt protestuesve.
Hetimet e SPAK janë përqendruar në zinxhirin komandues që dha urdhrin për të hapur zjarr luftarak kundrejt protestuesve para kryeministrisë. Muaj më parë gazetari Artan Hoxha dorëzoi në duart e hetuesve një audiopërgjim ku dëgjohej kreu i gardës asokohe Ndrea Prendi i cili orientonte për të hapur zjarr me arsyetimin se urdhri ishte dhënë nga lart. Versus.al
