Gjykata e Apelit në Tiranë miratoi masën arrest në burg për Denis Meçen, ndërsa detyrim paraqitje për Voltan Shkulakun, Leonidha Guçen e Arjan Manallarin, lidhur me vrasjen e Egli Progës.
Meçe kishte apeluar vendimin e Shkallës së Parë duke kërkuar masë më të butë, kërkesë e cila u rrëzua nga togat e zeza të Apelit me Juridiksion të Përgjithshëm.
Ndërkohë që prej 11 gushtit 2024, Meçe ndodhet i arrestuar me akuzat për 'vrasje nga pakujdesia', që nënkupton një masë dënimi më të ulët sesa vepra penale që kishte referuar dosjen policia 'vrasje me dashje'.
Ngjarja:
Fillimisht ngjarja u raportua si aksidentale, rrëzim i një personi të alkoolizuar.
Por më pas u zbuluan detaje të tjera të cilat tregonin se 42 vjeçari Egli Proga, baba i 2 fëmijëve ishte dhunuar për vdekje nga Denis Meçe.
Në dëshminë e tij Meçe është shprehur se nuk e njihte Egli Progën por sipas tij ai e ka ofenduar pa shkak pasi ishte në gjendje të dehur.
“Gjatë kohës që ishim ulur ne lokal, vjen ky djali, emrin nuk ja dija. Ai na ka përshëndetur dhe ka hyrë në lokal, në një moment mua më kanë mbaruar cigaret dhe kam hyrë brenda i kam thënë pronarit të lokalit për cigare, por atje ky djali më ka thënë: ja se ta dredh një unë dhe unë për respekt ja mora. Sa kam kthyer kurrizin ky më shau.
Unë i kam thënë po hajde pak jashtë të flasim, ai më shau sërish dhe kemi dalë jashtë. Unë kam dashur t’i fus një shpullë ta qetësoja por, sa i jam afruar kam ngritur dorën ai është rrëzuar në tokë dhe nuk u ngrit më. Mua nuk më është besuar hiç dhe pasi jam frikësuar nga situata jam larguar. Dua të them se unë kisha gjithë ditën që konsumoja alkool dhe me sa pashë edhe ai ishte i dehur”.
