Ndoc Maçaj, autori i vrasjes së Piro Prronit natën e kaluar, ka dhënë sot dëshminë para grupit hetimor. Maçaj, i cili rezulton të jetë kushëriri i 61-vjeçarit, ka deklaruar se krimi u krye pas një konflikti të gjatë mes tyre.
Sipas tij, Prroni e akuzonte prej një muaji për vjedhjen e portofolit, një gjë që Maçaj mohon kategorikisht.
“I bëra be në kishë që nuk e kisha vjedhur unë,” është shprehur ai para hetuesve. Megjithatë, kushëriri i tij vazhdonte ta akuzonte.
Mbrëmjen e ndodhisë, Prroni e kishte ofenduar sërish, duke e shtyrë Maçajn që të nxirrte armën e zjarrit dhe ta qëllonte për vdekje.
Ngjarja e rëndë ndodhi mbrëmjen e së mërkurës në fshatin Abat të Shalës, Shkodër. Pas ekzekutimit të 61-vjeçarit Piro Prronit, Ndoc Maçaj u largua nga vendi i ngjarjes, por arratisja e tij zgjati vetëm disa orë, pasi paraditen e së enjtes ai u dorëzua vetë në komisariat.
Fillimisht u raportua se konflikti mes dy kushërinjve lidhej me mosmarrëveshje pronësore, por dëshmia e dhënë nga Maçaj ka hapur një pistë tjetër hetimi. Grupi hetimor po shqyrton të gjitha mundësitë për të sqaruar arsyet që çuan Maçajn të marrje jetën e Prronit./Versus.al
