Një ngjarje shqetësuese është raportuar në qytetin e Sarandës, ku një 21-vjeçar është shpallur në kërkim nga Policia pas një akti dhune dhe kanosjeje ndaj familjes së ish-kandidates për deputete të Partisë Demokratike, Matilda Qurku.
Sipas njoftimit zyrtar të Policisë, i riu jo vetëm ka kanosur me thikë familjarët e znj. Qurku, por gjithashtu ka goditur edhe automjetin me të cilin ata udhëtonin. Ngjarja ka ndodhur në prani të dy fëmijëve të mitur, çka e bën situatën edhe më të rëndë.
Në një reagim publik në rrjetet sociale, Matilda Qurku shprehu indinjatën dhe shqetësimin e saj për këtë sulm të paprovokuar, duke theksuar se familjarët e saj janë kërcënuar në mënyrë të drejtpërdrejtë dhe se e gjithë ngjarja është ndodhur përpara fëmijëve të saj, duke u shkaktuar atyre trauma dhe frikë të madhe.
Policia e Sarandës ka nisur menjëherë hetimet dhe po punon për kapjen e autorit, i cili aktualisht është në kërkim, ndërsa ndaj tij rëndojnë akuzat për kanosje të rëndë, dëmtim prone dhe prishje të rendit publik. /Versus.al
