Seanca në GJKKO për kërkesën e Erion Veliajt për lirim nga qelia, u shty për datën 23 prill. Shkak për shtyrjen e seancës u bë kërkesa e avokatëve për t'u njohur me aktet hetimore 2 mujore.
Gjyqtari i posaçëm që shqyrton kërkesën e Veliajt është Erjon Bani, i njëjti që më 12 prill i konfirmoi masën e arrestit me burg. Tashmë Veliaj mbahet prej 2 muajsh në paraburgimin e Durrësit nën dyshimin se ka kryer veprat penale të korrupsionit pasiv në 9 raste dhe pastrimit të parave.
Sot u paraqitën në SPAK për dosjen e Veliajt edhe Marisa Nito, bashkëshortja e biznesmenit Elman Abule që mbahet në arrest shtëpie si dhe vetë biznesmeni për t'u njohur me aktet hetimore të SPAK.
Vendimi i Apelit të Posaçëm ku iu rrëzua kërkesa për lirim, u zbardh pak ditë më parë, ndërsa avokatët e kryebashkiakut do të bëjnë rekurs në Gjykatën e Lartë duke kundërshtuar masën e sigurisë dhe hetimin e nisur nga SPAK duke e cilësuar të paligjshëm pasi bazohet në një kallëzim anonim.
Ndaj bashkëshortes së Veliajt, Ajola Xoxa u caktua masa “detyrim paraqitje” për shkak se ka për t’u kujdesur për djalin e mitur. Ndryshim mase sigurie pati edhe ndaj biznesmenit Elman Abule i cili nga ‘arrest me burg’ u la në ‘arrest shtëpie. Pesë biznesmenët e tjerë Gentian Sula, Shkëlqim Fusha, Meriman Palushi, Fatmir Bektashi dhe Sokol Kryeziu janë kufizuar me masën “detyrim paraqitje”. Të gjithë dyshohet se kanë qenë pjesë e një skeme të ngritur nga Veliaj për të përvetësuar fonde nga bashkia e Tiranës. Versus.al
