Profesori i Krimnalistikës, Ervin Karamuço ka dhënë detaje të tjera lidhur me procesin hetimor për zbardhjen e ngjarjes së ndodhur pasditen e 30 tetorit në Dobraç të Shkodrës ku u ekzekutuan me breshëri Hamza Lici e Arlind Bushati, mjeti i të cilëve përplasi më pas për vdekje çiftin e bashkëshortëve me motor.
Sipas Karamuços, policia është shumë afër zbardhjes së ngjarjes me emra konkretë të autorëve që mund të jenë të përfshirë. Ai tha për Euronews se ka informacione se viktimat, Lici dhe Bushati janë ndjekur që nga Mali i Zi.
“Mund t’ju them se kjo ngjarje është në prag të zbardhjes. Nuk mund të them që jemi në prag të arrestimit të autorëve, sepse autorët edhe mund të jenë larguar. Janë gjetur shumë prova.
E para janë gjetur prova në kufi, ku tashmë do të provohet edhe nga deklaratat që do të japë në vijim Policia e Shtetit që viktimat janë ndjekur që nga territori i Malit të Zi në hyrje të territorit Shqiptar dhe më pas janë mbikëqyrur për aktivitetin që kanë pasur në Shkodër deri në kryerjen e atentatit. Madje dihet për autorët edhe dy apo tre shtëpi deri sa janë vendosur për të kryer atentatin”- u shpreh eksperti.
Më tej, profesori u shpreh se në qytetin e Shkodrës ka një intimidim të policisë për t’u marrë me grupet kriminale dhe shtoi se kjo gjë është vënë re edhe nga qytetarët. Karamuço u shpreh se përveç Izmir Sakicës dhe Samuel Troshanit të cilët janë shpallur në kërkim prej dy ditësh si persona të dyshuar, ka edhe 4 urdhra të tjerë ndalimi që mbahen në sirtar nga policia e Shkodrës.
“Këto shtëpi mund të lidhen edhe me persona konkret që mund të akuzohen si personat që kanë kryer atentatin. Ka një frikë dhe intimidim nga ana e policisë në qytetin e Shkodrës ku bëhet me dije se krahas atyre që janë në kërkim, janë edhe katër urdhra ndalimi që mbahen në sirtar nga policia e Shkodrës për katër persona konkret të dyshuar si autorë të kësaj masakre.
Kjo frikë është vënë re edhe nga qytetarët. Policia ka emra konkret, por edhe sikur ti dija nuk do i thoja. Di të them që në javën në vijim do ketë një reformë të thellë në nivelin drejtues të policisë së qarkut të Shkodrës të cilët detyrë do kenë rivendosjen e rendit dhe qetësisë publike në atë qytet”- tha Karamuço.
Numri i viktimave të masakrës së Dobraçit shkoi në 4 persona, pasi Bashkim Basha i cili mbeti i plagosur rëndë pasi u përplas nga mjeti i Hamza Licit, ndërroi jetë në spital. Bashkëshortja e tij Flutura Basha ndërroi jetë menjëherë në vendngjarje. Të dy po udhëtonin me motor ku u përplasën nga mjeti i Hamza Licit, pasi ky i fundit po tentonte t’i shpëtonte breshërisë së plumbave që vinin nga makina “Range Rover”.
Ndërkohë, policia po kryen hetime edhe për identifikimin dhe kapjen e personit tjetër që është filmuar në vendngjarje menjëherë pas atentatit, duke ngritur dyshimet se ai ka qenë në automjetin ku udhëtonin viktimat. Për ngjarjen, u mbajt edhe një marshim ditën e shtunë i thirrur nga Partia Demokratike ku qytetarët bënë thirrje për veprim të policisë ndaj krimit dhe distancim të qeverisë nga grupet kriminale. Versus.al
