Durim Bami, “i forti i Niklës” i cili u arrestua në Dubai të dielën që shkoi me qëllim për t’u deportuar me urgjencë drejt vendit tonë, iu është drejtuar me një kërkesë autoriteteve të Emirateve të Bashkuara ku u kërkon të rishikojnë vendimin e marrë për të pasi, sipas tij në vendin tonë i rrezikohet jeta.
Në argumentet e dhëna, i shumëkërkuari Bami përmend artikujt televizivë të realizuar për të ku emri i tij dhe i vëllait të tij Valter Bamit, përmendeshin në listën e personave për t’u ekzekutuar nga disa banda kriminale. Ai pretendon se në Shqipëri janë 16 banda që kërkojnë eleminimin e tij.
““Nëse doni të më dërgoni në Shqipëri, kjo është një vendimmarrje që ju takon juve. Por ju vë në dijeni se 16 banda kriminale më kanë vënë në shënjestër për të më eliminuar. Këtë nuk e them unë, nuk është mbi të dhëna që i kam ditur, por i kam mësuar nëpërmjet kanaleve televizive dhe medias së shkruar shqiptare që i përmdendin me emra. Disa prej emrave që përmenden nëpër media, janë edhe persona që konsiderohen me rrezikshmëri të lartë, dhe ende nuk janë arrestuar. Më rrezikohet jeta, kërkoj ta vlerësoni këtë çështje para se të merret një vendim për dërgimin tim në Shqipëri ose jo”, ka pretenduar Durim Bami para autoriteteve të drejtësisë.
Durim Bami u shfaq në dosjen e zbardhur së fundmi nga SPAK ku ish-deputeti Arben Ndoka kërkonte ta vriste në formë hakmarrje për vrasjen e vëllait të tij Aleksandër Ndoka. Për këtë qëllim, ish-deputeti socialist kishte komunikuar në “Sky Ecc” edhe me ish-bossin e lojërave të fatit, Ervis Martinajnë të zhdukur prej gushtit të vitit 2022. Versus.al
