Motra e Flutura Bashës, të moshuarës që ndërroi jetë gjithashtu pas atentatit të ndodhur ndaj Hamza Licit dhe Arlind Bushatit në Shkodër, ka folur për mediat duke bërë me dije se do të jetë në protestën e thirrur për t’u mbajtur ditën e nesërme në Shkodër në orën 12:00.
Për emisionin “Me Zemër të Hapur”, ajo rrëfeu se Flutura sapo kishte nisur punë dhe në momentin kur ka ndodhur ngjarja, ishte në motor me bashkëshortin e saj duke u kthyer në shtëpi ose duke shkuar në vendin e punës ku punonte prej 4 muajsh.
Ajo rrëfeu edhe kushtet e vështira ekonomike të familjes.
“Fati i saj i keq. Ishte ne vendin e gabuar në kohën e gabuar. Bashkimi është shumë keq. Akoma nuk ka dalë nga gjendja e rrezikut. Më vjen keq për nënat e viktimave thash kur mora vesh për viktimat.
Pastaj thanë se ishte edhe një çift, po i thoja tim shoqi mos o zot sikur ta kishim në fis. Flutura la pas dy vajza dhe një djalë. Bashkimi merrte 100 mijë lekë pension. Kishte 3-4 muaj që kishte nisur punë sanitare. Ishte e kënaqur me punën. Vendngjarja nga shtëpia e Fluturës në vijë ajrore nuk janë as një kilometër larg. Nuk e dimë nëse po ktheheshin në shtëpi apo po shkonin për në punë.
Bashkimi është ende në reanimacion, stafi i spitalit po i rri tek koka. Është në intubim, ka dëmtime gjithkund, vetëm një mrekulli mund ta shpëtojë”, tha ajo.
Çifti i të moshuarve pati fatin e keq që të ishte duke kaluar në një rrugë të Dobraçit pasditen e 30 tetorit, kur ndaj makinës ku udhëtonin Hamza Lici dhe Arlind Bushati u zbraz breshëri plumbash. Lici i cili drejtonte makinën në përpjekje për t’u shpëtuar atentatorëve, është përplasur me motorin që drejtohej nga Bashkim Basha dhe bashkë me të ndodhej edhe gruaja e tij Flutura Basha e cila ndërroi jetë në vend.
Autorët u larguan me shpejtësi dhe dogjën mjetin tip “Range Rover” të përdorur për kryerjen e atentatit. Ndërsa ka dyshime se bëhet fjalë për vrasës me pagesë nga Mali i Zi. Detajet e reja të publikuara, hodhën dyshimet se në makinë me Hamza Licin dhe Arlind Bushatin ndodhej edhe një person i tretë i cili është larguar nga vendngjarja pas atentatit të ndodhur. Të shtunën në orën 12:00 kryedemokrati Sali Berisha ka thirrur protestë në kryeqendrën e veriut. Versus.al
