Kryebashkiaku i arrestuar i Tiranës, Erion Veliaj do të dalë sot para gjykatës së Apelit të Posaçëm ku ka dorëzuar kërkesën për ndryshimin e masës “arrest me burg”.
Seanca do të nisë në orën 14:00 me gjyqtar Engert Pëllumbin, të njëjtin që më herët e ka lënë në qeli kreun e bashkisë. Veliaj ka ofruar një garanci pasurore pa përcaktuar një shumë të saktë në mënyrë që të bëhet i mundur ndryshimi i masës së sigurisë.
Që prej 10 shkurtit, Veliaj mbahet në paraburgim nën akuzat e korrupsionit në 9 raste dhe pastrimit të parave. Gjatë hetimeve për të, ndaj tij u shtua edhe akuza e futjes së sendeve të paligjshme në qeli pasi gjatë kohës që transportohej në gjykatë, kishte përdorur telefonin e një polici për të folur me gruan e tij.
Sipas avokatëve të Veliajt, nuk ekzistojnë rrethanat për mbajtjen në burg të kryebashkiakut i cili prej muajsh tashmë është ‘banor’ i Durrësit duke qenë se aty mbahet në paraburgim. Versus.al
