Ndryshe nga kryedemorkati Sali Berisha, dhëndri i tij Jamarbër Malltezi është lënë nën masën “arrest shtëpie” sa i takon aferës së privatizimit të ish-kompleksit “Partizani”.
Flojera Davidhi, e njëjta gjyqtare e cila ditë më parë liroi nga arresti shtëpiak ish-kryeministrin Sali Berisha, sot ka rrëzuar kërkesën e avokatëve mbrojtës të Mallezit për të revokuar masën “arrest shtëpie”.
Ndaj Malltezit rëndojnë akuzat e korrupsionit pasiv dhe pastrimit të parave, ndërsa dyshohet se ka përfituar në mënyrë të jashtëligjshme miliona euro gjatë procesit të privatizimit të ish-kompleksit sportiv.
Vendimi për të liruar Sali Berishën u mor më 27 nëntor nga gjyqtarja Flojera Davidhi me arsyetimin se nuk përbën rrezik për prishjen e provave të hetimit pasi tashmë dosja e “Partizanit” është dërguar në gjykatë dhe më 16 dhjetor vendoset nëse do të kalojë për gjykim apo do të pushohet. Nga ana tjetër, SPAK ka kundërshtuar lirimin e kreut të PD duke kërkuar rikthimin e tij nën arrest shtëpie. Versus.al
