Manovrat për t’u ankoruar në det me mot të trazuar shkaktuan përplasjen e dy trageteve në portin e Durrësit.
Fatmirësisht, nga ky incident nuk pati të lënduar, por vetëm dëme të vogla materiale. Ndërkohë, si pasojë e kushteve të këqija atmosferike, një traget që ishte planifikuar të nisej këtë mesditë nga Bari ka pezulluar lundrimin, dhe një tjetër do të niset pa udhëtarë.
Sipas informacioneve nga Kapiteneria e Portit, anijet e tonazhit të ulët dhe ato të peshkimit kishin pezulluar lundrimin një natë më parë. Era prej juglindjeje dhe dallgëzimi në det të hapur që arrin deri në 7 ballë ka komplikuar procedurat e lundrimit.
Situata është e ngjashme edhe në Vlorë, ku për gjatë gjithë ditës do të ndalohet dalja në det e anijeve të peshkimit dhe atyre me tonazh të ulët për shkak të dallgëve dhe erës së fortë. Gjatë paradites së kësaj të hëne, Vlorës i kanë rënë reshje të konsiderueshme shiu, duke ngjallur shqetësime për përmbytje. Bashkia ka bërë thirrje për qytetarët që të mos parkojnë automjetet në zona me risk të lartë, si rruga Albano, ajo Romina, zona përreth Bibliotekës Publike, afër Kishës Orthodhokse, në skelë dhe në shkollën ‘Halim Xhelo’, të cilat ishin përfshirë nga përmbytjet disa muaj më parë.
Edhe në veri të vendit, kanë rënë reshje shiu dhe dëbore. Në Kukës, janë shfaqur probleme në aksin Kukës-Bushtricë, ku disa automjete kanë mbetur të bllokuara për shkak të borës, dhe drejtuesit e automjeteve janë ankuar për mungesën e borëpastrueses.
Në Shkodër, mbi 800 metra lartësi, reshjet janë në formë dëbore, ndërsa në segmentin rrugor Qafe Mali-Fierze arrihen reshje të lehta bore, që s'kanë shkaktuar probleme për qarkullimin.
Në Lezhë, aktualisht janë regjistruar rreth 15 mm reshje shiu, por deri tani nuk kanë nxitur probleme të dukshme në rrjetin e kullimit. Autoritetet po mbajnë nën monitorim funksionimin e rrjetit të kullimit dhe argjinaturat./Versus.al
