Policia e Vlorës ka goditur një tjetër rast të tregtimit të mallrave kontrabandë. Në vijim të kontrolleve të ushtruara mbi subjektet tregtare, Seksioni për Hetimin e Krimeve Ekonomiko-Financiare, gjatë një inspektimi në një market në Sarandë, konstatoi mallra të futura në mënyrë të paligjshme, në shkelje të legjislacionit tatimor dhe doganor.
Si rezultat, u arrestua në flagrancë administratorja e marketit, Silvana Koronaci 49 vjeçe, banuese në Sarandë, e akuzuar për veprat penale “Kontrabanda me mallra që paguhet akcizë”, “Tregtimi dhe transportimi i mallrave kontrabandë” dhe “Fshehja e të ardhurave”.
Gjatë kontrollit u sekuestrua një sasi e konsiderueshme mallrash të dyshuara kontrabandë, ndër to: 402 produkte kozmetike, 195 paketime kafe, si dhe artikuj të tjerë pa dokumentacion të rregullt blerjeje.
Materialet procedurale i janë referuar Prokurorisë për veprime të mëtejshme, ndërsa policia ka paralajmëruar kontrolle të tjera ndaj subjekteve tregtare që dyshohen për shkelje të ligjit.
Njoftimi i policisë:
Në vijim të kontrolleve të vazhdueshme, të bazuara edhe në informacionet e siguruara në rrugë operative, Seksioni për Hetimin e Krimeve Ekonomiko-Financiare në DVP Vlorë, gjatë një kontrolli në një subjekt tregtar të tipit market, në Sarandë, konstatoi mallra kontrabandë, në shkelje të legjislacionit tatimor dhe doganor dhe, si rezultat, u arrestua në flagrancë shtetasja:
• S. K., 49 vjeçe, banuese në Sarandë, administratore e subjektit tregtar, për veprat penale “Kontrabanda me mallra që paguhet akcizë”, “Tregtimi dhe transportimi i mallrave që janë kontrabandë” dhe “Fshehja e të ardhurave”.
Në përfundim, u bë sekuestrimi i një sasie të konsiderueshme mallrash të dyshuara kontrabandë dhe mallrash për të cilat paguhet akcizë, të cilat nuk ishin të shoqëruara me dokumentacion përkatës blerjeje, dhe konkretisht: 402 copë produkte kozmetike; 195 paketime kafe dhe produkte të tjera të dyshuara kontrabandë.
Materialet procedurale iu referuan Prokurorisë, për veprime të mëtejshme.
