Elbasan- SPAK në bashkëpunim me policinë e rrethit dhe atë të Tiranës kanë kryer një operacion “blic” për goditjen e një grupi kriminal. Kontrolle janë zhvilluar në zonat që njihen si “baza” të të shumëkërkuarit Suel Çela i cili është shpallur në kërkim për një sërë ngjarjesh kriminale.
Ndërsa në kuadër të këtij operacioni, kanë rënë në pranga edhe Zihni Shahu, ish-kryetar i gjykatës së Elbasanit i dorëhequr në 2020-ën pak muaj para Vettingut dhe ish-gjyqtarja Pajtime Fetahu ndaj së cilës ishte caktuar masa “arrest shtëpie” për dyshimet e bashkëpunimit të saj me klanin e Çopjave. Masë "arrest shtëpie" është caktuar edhe për Blerina Beqirin, avokate e grupit kriminal të Suel Çelës.
Dyshohet se ish-gjyqtarët zbutën masën ndaj një antëtari të grupit të Suel Çelës në këmbim të shumave monetare.
Kontrolle janë zhvilluar edhe në banesën e ish-gjyqtarin Taulant Tafa, ndërsa operacioni vijon edhe në Tiranë.
Burime bëjnë me dije se ka edhe masa sigurie për persona në fushën e medias të cilët dyshohen si të përfshirë në veprimtarinë e bandave kriminale. Operacioni është zhvilluar pas zbërthimit të bisedave në aplikacionin “Sky Ecc” ku bëheshin planet e bandave kriminale për ngjarje të ndryshme.
Shahu ka mbajtur postin e kreut të gjykatës së Elbasanit për 10 muaj deri në shtator të vitit 2020 kur dha dorëheqjen nga posti. Për të KLGJ vendosi që ta përjashtonte për 15 vite nga sistemi i drejtësisë duke i hequr të drejtën e kandidimit në poste të caktuara.
Ndërsa Fetahu u dorëhoq nga posti i gjyqtares së Elbasanit në 2022-in. Ndaj saj GJKKO caktoi masën “arrest shtëpie” si një prej personave të arrestuar gjatë operacionit “Plumbi i artë 2” të zhvilluar gjatë muajit gusht të këtij viti. Ndaj saj po ushtrohen hetime për korrupsion pasi dyshohet se ka marrë para ng abanda e Çopjave në këmbim të vendimeve në favor të tyre.
Kush është Suel Çela?
Suela Çela rezulton të jetë i shpallur në kërkim në maj të vitit 2022 në kuadër të operacionit “Plumbi i Artë” të zhvilluar pas dëshmive të vrasësis me pagesë Nuredin Dumani. Në rrëfimin e tij, Dumani e nxorri Suel Çelën si personin që ka porositur 3 vrasje, dy prej tyre të parealizuara dhe një e mbetur në tentativë. Çela është i dënuar edhe në Itali për trafik droge, por ende nuk është bërë i mundur arrestimi i tij. Versus.al
