Deputeti i Partisë Socialiste, Xhemal Qefalia u paraqit mëngjesin e sotëm në ambientet e Prokurorisë së Posaçme (SPAK) për t’u pyetur si person në dijeni lidhur me protestën e 21 janarit 2011 ku u vranë 4 protestues si pasojë e të shtënave nga garda.
Qefalia ka qenë një prej organizatorëve të protestës së thirrur nga Partia Socialiste, asokohe në opozitë.
Në një pronocim për gazetarët pas daljes nga Prokuroria e Posaccme, deputeti Qefalia u shpreh se u pyet në cilësinë e një protestuesi duke shtuar se dosja e 21 janarit do të zbardhet pasi janë katër të vrarë.
'Besoj se do të zbardhet 21 janari pasi janë katër viktima. U pyeta si një protestues.’ u shpreh Qefalia.
Së fundmi, në kuadër të hetimeve të SPAK për 21 janarin, janë paraqitur në Prokurorinë e Posaçme edhe ish-drejtues të policisë së shtetit si Hysni Burgaj dhe zëvendësi i tij Agron Kuliçaj, të cilët kanë dhënë shpjegime mbi veprimet e efektivëve të policisë së shtetit më 21 janar. Burgaj deklaroi para prokurorëve të posaçëm se policia ishte përballur me një dhunë të pashoqe nga ana e protestuesve dhe se kishte vepruar në bazë të ligjeve për mbarëvajtjen e protestës.
Ndërkohë, në SPAK është dorëzuar një material audioregjistrim i siguruar në ditën kur ndodhi ngjarja dhe dyshohet se përmban urdhrin e dhënë për të hapur zjarr drejt protestuesve. Për pasojë SPAK po përqendrohet në hetimin e zinxhirit të lartë të komandimit të Gardës. Versus.al
