Pas Policisë së Shtetit për ngjarjen e rëndë të ndodhur më 18 nëntor para shkollës 9 vjeçare 'Fan Noli' në kryeqytet ku mbeti i vrarë 14-vjeçari Martin C. dhe i plagosur shoku i tij po 14 vjeçar Luis.M. ka reaguar dhe Ministri i Brendshëm, Ervin Hoxha.
Në postimin e tij Ministri shkruan se mbështet plotësisht në frymë dhe në gërmë deklaratën e Policisë së Shtetit dhe se i bashkohet thirrjes për mediat që të ndalin valën e dizinformit mbi autorin e dytë e vrasjes së të miturit Martin C.
Ministri shton më tej se fatkeqësisht disa ekrane dhe portale, si edhe të zakonshmit e këtyre rasteve në tribunën e politikës apo të maskuar si qëndrestarë të pavarur rrugëve qorre të luftës për pushtet, po përsërisin atë që bënë me ngjarjen e Pogradecit.
Por fatmirësisht-shkruan Ministri- kjo ngjarje është e regjistruar nga kamerat e sigurisë të cilat tregojnë qartë bllofin e madh të politizimit apo tregtimit mediatik të vdekjes.
Në njoftimin e saj policia shkruante se nga hetimet e deritanishme rezulton se kemi të bëjmë vetëm me një autor, ashtu siç ishte përshkruar dhe më parë në komunikatat e saj.
Por denoncimet janë bërë nga familjarë të viktimave dhe jo nga mediat, ku vetë i plagosuri L.M ka deklaruar se është goditur nga një tjetër bashkëmoshatar, shok i autorit të vrasjes së 14-vjeçarit.
Postimi i plotë i Ministrit të Brendshëm:
Mbështes plotësisht në frymë dhe në gërmë deklaratën e sotme të Policisë së Shtetit dhe i bashkohem thirrjes për mediat, që të ndalin valën e dizinformimit mbi autorësinë e vrasjes së nxënësit të shkollës "Fan Noli" dhe në përgjithësi mbi komunikatat e Policisë së Shtetit, siç bënë edhe në rastin e Pogradecit duke helmuar opinionin publik.
Konfirmoj edhe me përgjegjësinë time politike dhe ligjore vërtetësinë e komunikatave të Policisë së Shtetit mbi dinamikën e kësaj ngjarjeje.
Tymnaja mbi ekzistencën e një autori të dytë, i cili paska goditur me një tjetër thikë viktimën është prodhim i papërgjegjshmërisë mediatike, që s’ka asnjë lidhje me të vërtetën dhe me interesin publik.
Fatkeqësisht disa ekrane dhe portale, si edhe të zakonshmit e këtyre rasteve në tribunën e politikës apo të maskuar si qëndrestarë të pavarur rrugëve qorre të luftës për pushtet, po përsërisin atë që bënë me ngjarjen e Pogradecit.
Por fatmirësisht në këtë rast, ngjarja është e regjistruar nga kamerat e sigurisë, të cilat tregojnë qartë bllofin e madh të politizimit apo tregëtimit mediatik të vdekjes.
Konstatoj se përpjekja për të shfrytëzuar politikisht dhe mediatikisht situata të tilla, rritet bashkë me të dhënat pozitive të punës së Policia e Shtetit.
Histeria dizinformuese mesa duket motivohet nga rënia e përvitshme e numrit të vrasjeve dhe kur ndodh një tragjedi e tillë, të zakonshmit hidhen përpjetë sapo u vjen rasti! Sidoqoftë, e vërteta është e qartë si drita e diellit në komunikatat e Policisë së Shtetit, jo në lojën politike apo mediatike me vdekjen të atyre që ky popull ua ka marrë dorën prej kohësh.
/Versus.al
