Çfarë do të gjeni në brendësi
Pas dhunës që policia ushtroi ndaj protestuesve paraditen e sotme, mijëra qytetarë u rikthyen sërish në mbrëmje në sheshin para Kryeministrisë duke kërkuar dorëheqjen e qeverisë. Ata u mblodhën në sheshin “Skënderbej” mbrëmjen e sotme për të vijuar më pas me marshimin drejt kryeministrisë. Protestuesit në kor thërrasin 'Lironi çuat', referuar 8 të arrestuarve pas përplasjeve te Kuvendi. Një prej organizatorëve të protestës, tha sot se personat e arrestuar nga tensionet para Parlamentit, janë provokuar nga grupet kriminale që janë të implikuara brenda Policisë së Shtetit
Gazetari denoncon dhunën e ushtruar nga Ulsi Manja dhe bodigardët e tij: Njërit prej protestuesve iu thye hunda, protesta do të vazhdojë
Gazetari Klevin Muka denoncoi sot nga protesta para Kryeministrisë, dhunën e policisë ndaj protestuesve gjatë përplasjes tek Kuvendi, pak para nisjes së seancës plenare të paradites.
Muka tha se protesta e sotme tek Parlamenti kishte për qëllim tu tregonte deputetëve që nuk na përfaqësojnë.
“Në protestën e ditës së sotme kishim lajmëruar qytetarët që të pajiseshin me vezë dhe miell, me qëllim që të bënin pis deputetët që nuk përfaqësojnë votuesit, por kryetarin”, tha gazetari Klevin Muka duke shtuar se një prej protestueve është dhunuar nga truprojat e Ulsi Manjës, në një prej kafeneve pranë Kuvendit.
"Njërit prej protestuesve dyshohet se i është thyer hunda. Në atë moment dukej se policia kriminale ishte bërë gati për dhunimin e qytetarëve",- tha Muka.
Ai tha se pas kësaj, protesta vijoi normalisht, me qytetarët e revoltuar.
"Kjo ndodhi deri sa qytetarët, të ulur para Parlamentit, filluan të dhunoheshin nga policia. Policia e Shtetit ndërhyri me dhunë, duke përdorur shkopinj gome dhe gaz lotsjellës.
Kryeministrit Rama dhe shtetit kriminal i është sosur durimi. Ne do t'i themi që kjo protestë është gjëja më e bukur që i ka ndodhur këtij vendi dhe do të jemi këtu derisa ai të largohet në mënyrë paqësore, ashtu siç e kërkojnë qytetarët.
Nëse argumenti juaj është dhuna, argumenti ynë është qëndresa dhe rezistenca",- tha Muka.Versus.al
