Tiranë- Prokuroria e kryeqytetit ka kërkuar arrestimin e Ervis Mirit nën akuzën e falsifikimit të dokumentave për pjesëmarrje në tendera shtetërorë për trajtimin e mbetjeve spitalore.
Ervis Miri akuzohet gjithashtu se ka shkaktuar dëme në mjedis për shkak se nuk ka zotëruar pajisjet e nevojshme për kryerjen e punimeve pas marrjes së tenderit nga kompania e tij për kthimin e mbetjeve spitalore nga të dëmshme në të padëmshme.
Miri ka marrë pjesë në mbi 200 procedura tenderi dhe pas hetimeve ka rezultuar se nuk kishte kapacitete për trajtimin e mbeteve spitalore. Bashkëpunëtori i tij E.Sh akuzohet se e ka ndihmuar Ervis Mirin të përpilojë akte të rreme që prej vitit 2015 e në vijim.
Të përfshirë në këtë veprimtari rezultojnë edhe 8 inspektorë shtetërorë të cilët nuk kanë raportuar për zhvillimin e punës dhe mungesën e pajisjes “Econos Tsc 150” të nevojshme për trajtimin e mbetjeve spitalore.
“Deri në këtë fazë të hetimeve, rezultoi e provuar se shtetasi E.M., në bashkëpunimin me shtetasin E.Sh, kanë përpiluar akte të rreme prej vitit 2015 e në vijim, duke pasqyruar në kërkesat e tyre drejtuar AKM-së, nëpërmjet QKB-së, si dhe raporteve të vetmonitorimit peridike, në funksion të Lejes së Tipit B, një pajisje të tipit Econos Tsc 150, e cila në fakt është instaluar pas muajit Janar të vitit 2024.
Personi juridik, është inspektuar nga punononjësit shtetëror I.B, dhe K.A, por është mbuluar nga këta të fundit për mungesën e paisjes Econos Tsc 150. Po kështu,edhe inspektorët shtetërorë J.Sh, E.P, A.M, N.D, A.K, B.L, kanë mbuluar veprimtarinë reale të personit juridik, duke mos raportur pika shkarkimi në ajër dhe tokë të pajisjes Mangazini, të identifikuar nga Ing G.T, në historik, si dhe duke mos raportuar se në vend të ushtrimit të aktivitetit, gjendet i instaluar vetëm një incerenator”- njofton prokuroria.
Rezulton e provuar se pasija Econos TSC 150, e kqyrur nga oficerët e policisë gjyqësore, është importuar, në datën 22.01.2024, nga personi juridik ndryshe nga sa ka deklaruar Ervis Miri, se paisjen Econs TSC 150 e ka importuar dhe instaluar në vitin 2016. Versus.al
