Një tërmet i fortë me magnitudë 6.2 goditi në orët e para të mëngjesit bregun perëndimor të Zelandës së Re, sipas Institutit Amerikan të Gjeologjisë (USGS). Fatmirësisht, nuk është lëshuar paralajmërim për cunami dhe deri më tani nuk raportohet për dëme apo të lënduar.
Lëkundjet sizmike u regjistruan rreth orës 01:00 të mëngjesit, me epiqendrën rreth 300 kilometra në jugperëndim të qytetit Invercargill. Tërmeti kishte një thellësi të cekët, vetëm 10 kilometra nën sipërfaqe, çka shpesh e rrit ndjeshmërinë e lëkundjeve në sipërfaqe.
Zelanda e Re, me një popullsi prej rreth pesë milionë banorësh, ndodhet në të ashtuquajturën “Unaza e Zjarrit” të Paqësorit – një zonë shumë aktive sizmike që rrethon Oqeanin Paqësor dhe ku ndodhin shumica e tërmeteve në shkallë globale.
Tërmetet me magnitudë nga 6.0 deri në 6.9 klasifikohen si të fortë dhe, në varësi të thellësisë dhe afërsisë me zona të banuara, mund të shkaktojnë dëme të konsiderueshme, madje edhe në struktura të ndërtuara mirë. Sipas statistikave, në botë çdo vit ndodhin mesatarisht 100 deri në 150 tërmete të kësaj shkalle.
Autoritetet në Zelandën e Re vijojnë monitorimin e situatës, ndërsa qytetarët janë këshilluar të qëndrojnë të informuar dhe të ndjekin udhëzimet zyrtare në rast të paslëkundjeve.
