Një ngjarje me fund të lumtur është regjistruar këtë të diel në plazhin e Velipojës, ku një 67-vjeçar u shpëtua falë reagimit të shpejtë të vrojtuesit të plazhit.
Sipas informacioneve, Bardhyl Xhahysa dyshohet se ka pësuar një atak kardiak teksa po lahej në det.
Situata u vu re menjëherë nga vrojtuesi i plazhit, Besfort Gjoklaj, i cili ndërhyri pa humbur kohë dhe e nxori të moshuarin në breg.
67-vjeçari ndodhej pa puls dhe pa frymëmarrje, ndërsa vrojtuesi i dha menjëherë ndihmën e parë.
Pas disa minutash përpjekjesh dhe manovrave të reanimimit, ai arriti t’i nxirrte sasinë e madhe të ujit që kishte gëlltitur, duke bërë që i moshuari të rifitonte shenjat jetësore.
Më pas, 67-vjeçari u transportua me urgjencë në Spitalin Rajonal të Shkodrës, ku po merr trajtimin e nevojshëm mjekësor.
Reagimi i shpejtë dhe profesional i vrojtuesit të plazhit rezultoi vendimtar, duke i shpëtuar jetën pushuesit./Versus.al
