Pavarësisht se ka mbajtur një rol të baraslarguar në konfliktin e ndodhur së fundmi mes Izraelit dhe Iranit, presidenti turk Rexhep Taip Erdogan ka akuzuar kryeministrin izraelit Benjamin Netanyahu duke e konsideruar qeverinë e tij si “pengesën më të madhe” për paqen në Lindjen e Mesme.
Recep Tayyip Erdogan tha se Izraeli është përpjekur të “sabotojë” çdo bisedim bërthamor midis SHBA-së dhe Iranit, duke treguar se nuk dëshiron diplomaci me sulmet e tij. Ai u bëri thirrje vendeve perëndimore të mos dëgjojnë dialogun “helmues” të Izraelit mbi konfliktin, por në vend të kësaj të gjejnë një zgjidhje diplomatike.
Disa vende i kanë bërë thirrje Iranit të ulet në tryezën e negociatave për të gjetur një zgjidhje për konfliktin. Zyrtarët iranianë kanë thënë se një zgjidhje diplomatike nuk do të jetë e mundur ndërsa sulmet e Izraelit vazhdojnë.
Ndërkohë ambasadorët nga gjashtë shtete të Gjirit kanë ngritur shqetësime te mbikëqyrësi bërthamor i OKB-së në lidhje me synimin e Izraelit ndaj lokacioneve bërthamore në Iranin fqinj.
Të dërguarit nga Këshilli i Bashkëpunimit të Gjirit (GCC) paralajmëruan Rafael Grossi-n, kreun e Agjencisë Ndërkombëtare të Energjisë Atomike, për “pasoja të rrezikshme” gjatë një takimi në Vjenë.
GCC është një aleancë politike dhe ekonomike midis Arabisë Saudite, Kuvajtit, Emirateve të Bashkuara Arabe, Katarit, Bahreinit dhe Omanit. Paralajmërimi vjen pasi ushtria izraelite tha në një moment të enjten se kishte goditur centralin e vetëm bërthamor në funksion të Iranit, Bushehr, përpara se ta tërhiqte deklaratën si “një gabim”. Objekti i ndërtuar nga Rusia ndodhet në bregdetin e Gjirit dhe një sulm mund të kontaminonte ajrin dhe ujin. Versus.al
