Mbrëmjen e së dielës, tensionet mes Iranit dhe Izraelit shënuan një përshkallëzim të ri të rrezikshëm, pasi rreth 30 raketa u lëshuan nga territori iranian në drejtim të shtetit hebre. Autoritetet izraelite kanë konfirmuar se janë aktivizuar sistemet e mbrojtjes ajrore në disa qytete, ndërsa alarmi i raketave ka rënë në Haifa, Tel Aviv dhe zona të tjera përreth.
Sipas burimeve të paqarta në rrjetet sociale, shumica e raketave janë interceptuar në ajër nga mbrojtja ajrore izraelite, por të paktën një prej tyre ka arritur të godasë një zonë rezidenciale në qytetin portual të Haifës. Deri më tani nuk raportohet për viktima apo të plagosur, megjithëse autoritetet kanë nisur hetimet për dëmet materiale dhe pasojat e mundshme afatgjata.
Irani ka pretenduar zyrtarisht se një nga objektivat ishte një fabrikë e municioneve dhe teknologjisë ushtarake të avancuar, “Rafael Advanced Defense Systems”, një prej kompanive më të rëndësishme të mbrojtjes në Izrael, e cila është e lidhur ngushtë me prodhimin e sistemit të mbrojtjes ajrore “Iron Dome” dhe teknologjive të tjera strategjike.
Deri tani, qeveria izraelite nuk ka dhënë një deklaratë të detajuar zyrtare për sulmin, por burime të mbrojtjes kanë bërë të ditur se situata është nën kontroll dhe se forcat ajrore janë në gatishmëri të lartë për çdo reagim të mundshëm.
Ky zhvillim vjen në një moment kur rajoni i Lindjes së Mesme është veçanërisht i tensionuar, pas një serie shkëmbimesh zjarri dhe sulmesh ajrore në territoret e Gazës, Sirisë dhe Iranit. Rreziku i një konflikti më të gjerë mbetet i lartë, ndërkohë që komuniteti ndërkombëtar u ka bërë thirrje palëve për vetëpërmbajtje dhe dialog. /Versus.al
