Ka mbetur vetëm 0,001% mundësi që asteroidi 2024 YR4 të godasë Tokën më 22 dhjetor 2032, por është rritur mundësia që ai të përplaset me Hënën.
Këto janë të dhënat më të fundit të llogaritura nga NASA pas vëzhgimeve me infra të kuqe të kryera më 8 dhe 26 mars nga teleskopi hapësinor James Webb, i cili ka vëzhguar këtë objekt hapësinor të zbuluar më 27 dhjetor të vitit të kaluar nga një teleskop i vendosur në Kili.
A është Hëna në rrezik?
Mundësia që asteroidi të godasë sipërfaqen hënore është rritur nga 3,1% (në fund të shkurtit) në 3,8% tani.
“Mos harrojmë që ka 96,2% mundësi që të mos godasë as satelitin tonë natyror”, ka kujtuar vetë agjencia hapësinore amerikane.
Shpejtësia e përplasjes, në rast se ndodh, është llogaritur në 14 kilometra në sekondë, që përkthehet në 50.400 kilometra në orë – mjaftueshëm për të krijuar një krater me diametër 1,5 deri në 2 kilometra.
Sipas NASA/JPL, pozicioni i Tokës dhe Hënës në raport me asteroidin më 22 dhjetor 2032 tregon se trajektorja e mundshme e përplasjes prek vetëm Hënën.
Përmasat e asteroidit
Falë vëzhgimeve më të detajuara, është zvogëluar edhe pasiguria mbi madhësinë e asteroidit.
Në fillim, mendohej se kishte një diametër prej 40–90 metrash, por tani është përcaktuar se ai është ndërmjet 53 dhe 67 metrash – afërsisht sa një ndërtesë 15-katëshe. Burimi: Corriere della Sera / Versus.al/
