Të martën në mëngjes herët, zyrtarë të imigracionit dhe një ekip televiziv i BBC-së u mblodhën në një parking pranë Sheffieldit për një seri arrestimesh të koordinuara që synonin trafikantë njerëzish. Një nga të arrestuarit – me pizhamat veshur – u kap pa rezistencë dhe u dërgua në pranga. Pamjet u transmetuan në lajme të mbrëmjes si një operacion i suksesshëm kundër trafikimit të njerëzve.
Kryeministri Keir Starmer publikoi fotografi dhe deklaroi shkurt: “Kur thashë se do t’i shkatërrojmë bandat e trafikimit, e kisha seriozisht.” Qeveria e tij është nën presion të madh për të treguar se po përmbush premtimin për të “shkatërruar bandat kriminale”.
Por, sipas raportit, operacionet nuk kishin lidhje me kalimet ilegale përmes Kanalit Anglez. Në fakt, të arrestuarit ishin të përfshirë në ndihmën e rreth 200 qytetarëve të Botsvanës për të hyrë me viza turistike dhe për të kërkuar azil ose punësim në mënyrë të paligjshme.
Statistikat tregojnë se emigracioni përmes varkave të vogla është rritur ndjeshëm: vetëm javën e kaluar 1,195 persona mbërritën në Britani me 18 varka, shifra më e lartë për vitin 2025 – një rritje prej 42% krahasuar me vitin e kaluar.
Opozita akuzon qeverinë se po "fajëson motin" për rritjen e kalimeve, ndërsa Nigel Farage dhe partia Reform UK kërkojnë shpalljen e një “emergjence kombëtare për emigracionin ilegal”.
Ekspertët thonë se operacionet e fundit janë më shumë një strategji për marrëdhënie me publikun se sa zgjidhje reale. Ligji që parashikon përdorimin e kompetencave kundër terrorizmit për të ndalur trafikimin ende nuk është miratuar. Ndërkohë, rrjetet e trafikimit mbeten shumë të sofistikuara, të decentralizuara dhe të vështira për t’u çmontuar.
Hulumtime nga Universiteti i Oksfordit zbuluan se shumë prej atyre që janë burgosur për kalime të paligjshme me varka janë refugjatë nga vende të përfshira nga lufta, si Afganistani, Siria dhe Eritrea – dhe ndalimi i tyre bie ndesh me ligjin ndërkombëtar. Madje, së paku 17 fëmijë janë arrestuar për "ndihmim" vetëm pse kanë prekur timonin e një varke.
Shefi i Këshillit për Refugjatët, Enver Solomon, u bëri thirrje autoriteteve të ulin tonin dhe të punojnë më shumë me vendet evropiane për të ofruar rrugë të sigurta dhe ligjore për azilkërkuesit. Ai paralajmëroi se retorika agresive krijon pritshmëri të pamundura dhe në fund minon besimin e publikut.
