Një gjykatës federal i mohoi përkohësisht një ekipi të administratës Trump të udhëhequr nga Elon Musk aksesin në sistemet qeveritare të përdorura për të përpunuar triliona dollarë në pagesa, duke përmendur rrezikun e zbulimit të papërshtatshëm të informacionit të ndjeshëm dhe konfidencial.
Gjykatësi Paul Engelmayer në Manhattan lëshoi këtë të shtunë urdhrin pasi një koalicion prej 19 shtetesh amerikane, me prirje kryesisht demokratike, ngritën një padi mbrëmë vonë, duke argumentuar se Departamenti i Efikasitetit të Qeverisë i Musk (DOGE) nuk ka të drejtën ligjore për të hyrë në sistemet e Departamentit të Thesarit të SHBA-së.
Urdhri i përkohshëm, në fuqi deri në një seancë të caktuar për 14 shkurt, gjithashtu thekson se kushdo që ka aksesuar të dhënat nga arkivat e Departamentit të Thesarit që nga inaugurimi i Donald Trump më 20 janar duhet "të shkatërrojë menjëherë të gjitha kopjet e materialit të shkarkuar".
Bashkëpunëtorët e Elon Musk, i emëruar nga zoti Trump në krye të Doge, kishin marrë kontrollin e sistemit të pagesave të Thesarit Amerikan pak ditë më parë, një masë e denoncuar nga demokratët e zgjedhur si "jashtëzakonisht e rrezikshme".
“Kërcënimi më i madh i brendshëm”
Çështja u ngrit nga prokurorë nga 19 shtete amerikane, duke argumentuar se administrata Trump kishte shkelur ligjin duke zgjeruar aksesin në të dhënat e ndjeshme të Thesarit për anëtarët e stafit të Doge, një komitet i ngarkuar nga presidenti me reduktimin e shpenzimeve qeveritare.
Këto shtete "do të pësonin dëm të pariparueshëm në mungesë të masave urgjente", tha gjyqtari Engelmayer në urdhrin e tij. “Kjo është si për shkak të rrezikut të paraqitur nga politika e re e zbulimit të informacionit të ndjeshëm dhe konfidencial, ashtu edhe për shkak të rrezikut të shtuar që sistemet në fjalë të jenë më të prekshme ndaj hakerimit se më parë,” shkroi ai.
Marrja e sistemit të pagesave të Thesarit nga njeriu më i pasur në botë ishte kundërshtuar gjithashtu ashpër nga sindikatat dhe grupet e të drejtave të njeriut.
Sipas një memorandumi të brendshëm të Thesarit të SHBA-së, qasja e ekipit Doge në sistemet federale të pagesave përbën "kërcënimin më të madh të brendshëm që Shërbimi i të Ardhurave të Brendshme është përballur ndonjëherë", raportojnë mediat amerikane.
