Një muaj pas rrëzimit tragjik të avionit të kompanisë Air India, i cili shkaktoi vdekjen e 270 personave, hetimi po përqendrohet tek veprimet e pilotëve. Deri tani, nuk janë konstatuar probleme me avionin Boeing 787 Dreamliner, ndërsa dyshimet lidhen me ndërprerjen e furnizimit me karburant.
Sipas një raporti të Wall Street Journal (WSJ), që citon burime nga hetimi dhe autoritetet amerikane, çelësat që kontrollonin rrjedhën e karburantit në të dy motorët rezultojnë të kenë qenë të fikur në momentet kritike të fluturimit. Këto çelësa përdoren zakonisht për ndezjen, fikjen ose rivendosjen e motorëve në raste emergjente, por gjatë fluturimit duhet të qëndrojnë gjithmonë të ndezur.
Ajo që ende nuk është e qartë është nëse çelësat u fikën aksidentalisht apo qëllimisht, apo nëse ka pasur përpjekje për t’i ndezur sërish pak para përplasjes. Aktivizimi i turbinës ajrore të emergjencës (RAT) pak çaste para aksidentit tregon se avioni kishte humbur fuqinë nga të dy motorët, një sinjal që mbështet teorinë e ndërprerjes së furnizimit me karburant.
Hetimi po drejtohet nga Byroja e Hetimit të Aksidenteve Ajrore të Indisë (AAIB), e cila pritet të publikojë së shpejti një raport paraprak. Informacionet më të detajuara pritet të vijnë nga kutia e zezë, e cila do të zbulojë manovrat e pilotëve dhe komunikimet e fundit para rrëzimit.
Ngjarja ndodhi kur avioni, në një fluturim rutinë drejt Mumbai-t, u rrëzua mbi një konvikt studentësh të një fakulteti mjekësor, duke shkaktuar një nga tragjeditë më të mëdha ajrore të dekadës në Indi. Të gjithë personat në bord humbën jetën, përveç një të mbijetuari që arriti të dalë nga rrënojat pa lëndime serioze.
Hetuesit janë të kujdesshëm në nxjerrjen e përfundimeve, por ky zhvillim i fundit ngre pikëpyetje serioze mbi trajnimet, përgatitjen dhe reagimin e ekuipazhit në situata emergjente. Në pritje të raportit zyrtar, publiku dhe familjarët e viktimave kërkojnë transparencë dhe përgjegjësi për këtë tragjedi të rëndë. /Versus.al
