Francë- Presidenti francez Emmanuel Macron të enjten do të kërkojë mënyra për të dalë nga kriza politike e Francës, pasi dje Michel Barnier u bë kryeministri i parë që u rrëzua nga parlamenti në më shumë se gjashtë dekada.
Ligjvënësit votuan të mërkurën për të rrëzuar qeverinë e Barnier pas vetëm tre muajsh në detyrë, duke miratuar një mocion mosbesimi të propozuar nga e majta e fortë, por që në mënyrë thelbësore u mbështet nga e djathta ekstreme e kryesuar nga Marine Le Pen.
Rrëzimi në kohë rekord i Barnier vjen pas zgjedhjeve të parakohshme parlamentare këtë verë, të cilat rezultuan në një parlament ku asnjëra prej partive nuk arriti të siguronte shumicën e përgjithshme dhe duke bërë që e djathta ekstreme të mbajë çelësin e mbijetesës së qeverisë.
Macron tani ka detyrën për të zgjedhur një pasardhës të mundshëm për kryeministër, ndërkohë që atij vetë i kanë mbetur 2 vite nga mandati presidencial, kur të gjithë në Francë po i bëjnë thirrje të japë dorëheqjen.
Barnier do t'i paraqesë Macron dorëheqjen e qeverisë së tij të enjten në mëngjes. Më pas Macron do t’i drejtohet kombit francez në një deklaratë në orën 19:00.
Mocioni i mosbesimit, i sjellë nga e majta e fortë në Asamblenë Kombëtare, erdhi në mes të një bllokimi mbi buxhetin shtrëngues të vitit të ardhshëm, pasi kryeministri të hënën detyroi një projekt-ligj për financimin e sigurimeve shoqërore pa votim. Me mbështetjen e së djathtës ekstreme, një shumicë prej 331 deputetësh në dhomën prej 577 anëtarësh u votua për rrëzimin e qeverisë duke e futur Francën në një krizë të thellë politike. Versus.al
