Izraeli po pezullon hyrjen e ndihmave humanitare në Rripin e Gazës, pasi ka përfunduar faza e parë e marrëveshjes së armëpushimit me Hamasin, njoftoi sot zyra e kryeministrit izraelit Benjamin Netanyahu.
“Me përfundimin e fazës së parë të marrëveshjes së pengjeve dhe duke pasur parasysh refuzimin e Hamasit për të pranuar planin Witkoff për vazhdimin e bisedimeve, për të cilin ra dakord Izraeli, kryeministri Netanyahu ka vendosur se që nga mëngjesi i sotëm të pezullohet të gjitha hyrjet e produkteve dhe furnizimeve në Rripin e Gazës”, thuhet në deklaratë.
“Izraeli nuk do të pranojë një armëpushim pa lirimin e pengjeve tanë”, theksohet në deklaratë, duke kërcënuar me “pasoja të tjera” nëse vazhdojnë mosmarrëveshjet me Hamasin për armëpushimin.
