Që prej së premtes, kur Izraeli ndërmori një sulm me raketa ndaj territorit iranian, hapësira ajrore mbi Lindjen e Mesme është përfshirë nga një kaos, duke shkaktuar anulime dhe devijime masive të fluturimeve në mbarë botën.
Pamjet nga webiste i monitorimit të fluturimeve Flightradar24 tregojnë momentin dramatik, kur brenda vetëm 9 sekondave, hapësira ajrore mbi Iran u boshatis pothuajse tërësisht. Avionët civilë u tërhoqën menjëherë nga rruga ajrore që kalon mbi Iran dhe rajonet përreth, pas raportimeve për sulmin izraelit mbi zemrën e programit bërthamor të Teheranit.
Hapësira ajrore mbi Iran, Irak, Izrael dhe Jordani u mbyll në mënyrë të koordinuar pas nisjes së sulmit, ndërsa Siria ndërmori masa të ngjashme për arsye sigurie. Si pasojë:
• Mijëra pasagjerë janë bllokuar ose përballen me vonesa të gjata.
• Fluturimet komerciale janë devijuar në rrugë më të gjata, përmes Egjiptit dhe Arabisë Saudite në jug, ose përmes Turqisë, Azerbajxhanit dhe Turkmenistanit në veri.
• Aeroportet në Izrael janë mbyllur deri në një njoftim të dytë, ndërsa kompanitë ajrore ndërkombëtare kanë pezulluar përkohësisht udhëtimet drejt dhe nga rajoni.
Sipas vlerësimeve të Eurocontrol, autoriteti evropian për menaxhimin e trafikut ajror, rreth 1,800 fluturime janë prekur vetëm në linjat që lidhin Evropën me Lindjen e Mesme dhe më tej.
Kompani si Lufthansa, Air France, British Airways dhe Emirates kanë lëshuar njoftime zyrtare për anulime dhe devijime, duke u kërkuar pasagjerëve të kontrollojnë statusin e udhëtimit përpara nisjes.
Kriza në Lindjen e Mesme po tregon efektet e saj përtej rajonit të konfliktit, duke ndikuar në mënyrë zinxhirore sektorin e aviacionit global. Linjat ajrore përballen me rritje të kostove të karburantit, zgjatje të kohës së fluturimit dhe nevojë për koordinim të ri operacional, ndërsa pasagjerët mbeten të pasigurt për itineraret e tyre./Versus.al/
