Rusia denoncoi sot "retorikën ushtarake" të Gjermanisë, me ministrin e jashtëm rus Sergei Lavrov që akuzoi vendin se synon të udhëheqë riarmatim evropian, duke iu referuar të kaluarës naziste të Gjermanisë.
"Sa i përket militarizimit të Gjermanisë, ne kemi shprehur vazhdimisht shqetësimet tona shumë të thella", tha Lavrov në një konferencë për shtyp në Asamblenë e Përgjithshme të OKB-së.
“Ky nuk është vetëm një proces i vazhdueshëm i rimilitarizimit. Ka gjithashtu shenja të qarta të një ringjalljeje të nazizmit”, vazhdoi ai.
“Pse po ndodh kjo? Ndoshta për të njëjtin qëllim që kishte Hitleri: të nënshtronte të gjithë Evropën dhe të përpiqej të shkaktonte një disfatë strategjike të Bashkimit Sovjetik atëherë dhe Rusisë sot”, shtoi Lavrov.
Që nga ardhja në pushtet e konservatorit Friedrich Merz si kancelar, Gjermania ka synuar të bëhet maja e riarmatimit evropian, duke pasur parasysh kërcënimin rus dhe mosangazhimin amerikan.
Ministri gjerman i Mbrojtjes, Boris Pistorius, njoftoi të enjten se një paketë prej 35 miliardë eurosh do të ndahet deri në vitin 2030 për një “arkitekturë sigurie” në hapësirë, pasi Rusia dhe Kina përbëjnë një kërcënim të rëndësishëm edhe në këtë fushë. Ai tha gjithashtu se vendi do të hynte në një “garë armatimesh” në fushën e mjeteve ajrore pa pilot.
Po atë ditë, ushtria gjermane filloi gjithashtu tre ditë ushtrimesh në Hamburg. Skenari: një përshkallëzim ushtarak në kufijtë e shteteve baltike, fqinjëve të Rusisë.
“Kancelari (gjerman) deklaroi me krenari se qëllimi i tij është ta bëjë Gjermaninë, edhe një herë, fuqinë kryesore ushtarake në Evropë”, tha Lavrov. “Dhe kur dikush në një vend që kreu krimet e nazizmit, fashizmit dhe Holokaustit (...) pretendon se Gjermania duhet të bëhet përsëri një fuqi e madhe ushtarake, kjo tregon një kujtesë të dobët historike dhe kjo është jashtëzakonisht e rrezikshme”, përfundoi ai.
