Ministri i Jashtëm rus Sergei Lavrov komentoi sot pozitivisht qëllimin realist të presidentit amerikan Donald Trump për t'i dhënë fund luftës në Ukrainë, por qortoi Evropën që kërkon të vazhdojë konfliktin, njoftuan agjencitë ruse të lajmeve.
“Donald Trump është një pragmatist. Motoja e tij është e mira e përbashkët. Kjo, tashmë është e qartë për të gjithë, do të thotë një kalim në një mënyrë tjetër qeverisjeje. Megjithatë, qëllimi mbetet i njëjtë: MAGA (Make America Great Again). Tani ai ka një kapelë të re me sloganin: "Çfarëdo që premtoi Donald Trump, ai e bëri". Kjo i jep një dimension të gjallë e njerëzor politikës. Kjo është arsyeja pse është një rast interesant i një politikani”, tha ministri rus në një intervistë për grupin mediatik Krasnaya Zvezda.
Sipas Lavrov, ekipi i Trump, i përbërë nga Sekretari i Shtetit Marco Rubio dhe Këshilltari i Sigurisë Kombëtare i SHBA, Mike Walz, janë "njerëz absolutisht të arsyeshëm në çdo kuptim të fjalës. Këta përfaqësues të administratës së re amerikane morën pjesë në ekipin negociator gjatë takimit mes Rusisë dhe SHBA-së në Riad. Ata flasin në bazë të mirëkuptimit të ndërsjellë se nuk na urdhërojnë dhe ne nuk i urdhërojmë ata. Dy vende serioze u ulën për të diskutuar se ku po bëhen gabime dhe çfarë ka gabuar qeveria e mëparshme gjatë katër viteve - duke shkatërruar të gjitha kanalet e komunikimit pa përjashtim, duke vendosur një sërë sanksionesh dhe duke ndjekur një politikë të largimit të kompanive amerikane nga Rusia, me humbje që arrijnë në qindra miliarda dollarë", tha kreu i Ministrisë së Jashtme ruse.
Zelensky është një "nazist i pastër"
Volodymyr Zelensky tani është bërë një "nazist i pastër" dhe një tradhtar i popullit hebre, tha ministri i Jashtëm rus në të njëjtën intervistë.
“Zelensky bëri një kthesë 180 gradë. Nga një njeri që erdhi në pushtet me slogane paqeje, me slogane si ‘lëre të qetë gjuhën ruse, është gjuha jonë e përbashkët, kultura jonë e përbashkët’, brenda gjashtë muajve ai u shndërrua në një nazist të pastër dhe, siç tha me të drejtë presidenti rus Vladimir Vladimirovich Putin, në një tradhtar të popullit hebre”, vuri në dukje Lavrov.
Pas kthimit në Shtëpinë e Bardhë më 20 janar, Donald Trump ndryshoi ndjeshëm politikën e jashtme amerikane, duke u rreshtuar më shumë me Moskën.
Të premten, ai sulmoi verbalisht presidentin ukrainas Volodymyr Zelensky në një konfrontim të paprecedentë që ata patën në Shtëpinë e Bardhë.
Peskov: Diplomacia e SHBA përputhet me vizionin e Rusisë
Komentet e bëra nga Dmitry Peskov të mërkurën e kaluar, në një intervistë që ai dha për televizionin shtetëror rus dhe e cila u incizua para takimit shpërthyes në Zyrën Ovale, u publikuan sot.
Në këtë intervistë, zëdhënësi i Kremlinit vlerësoi se ndryshimi rrënjësor në politikën e jashtme të SHBA nën Trump përputhet kryesisht me vizionin e Rusisë.
