Rusia dhe Ukraina kanë shkëmbyer një numër rekord të sulmeve me dronë mbrëmjen e së shtunës. Moska lëshoi 145 dronë brenda një nate, numri më i madh që prej nisjes së luftës.
“Natën e kaluar, Rusia lëshoi një rekord prej 145 Shaheds dhe drone të tjerë sulmues kundër Ukrainës”, tha të dielën Presidenti ukrainas Volodymyr Zelensky.
Ndërsa Ukraina gjithashtu u përgjigj me një numër të paprecedentë dronësh të lëshuar drejt Rusisë.
Zelensky shtoi se gjatë javës, Rusia ka përdorur më shumë se 800 bomba ajrore të drejtuara, rreth 600 dronë sulmues dhe gati 20 raketa të llojeve të ndryshme.
Komanda e Forcave Ajrore të Ukrainës tha në një deklaratë se Rusia "sulmoi Ukrainën me një numër rekord të UAV-ve" të shtunën mbrëma. Sipas komandës së Forcave Ajrore, që nga ora 9:30 e mëngjesit të së dielës me orën lokale, 62 nga dronët u rrëzuan nga mbrojtja ukrainase.
Ukraina ndërkohë nisi sulmin e saj më të madh ndaj Moskës që nga fillimi i luftës gjatë natës, duke ndërprerë fluturimet në dy aeroporte në kryeqytetin rus.
Gjithsej 34 dronë u nisën në drejtim të Moskës, tha Ministria ruse e Mbrojtjes. Mbrojtja ajrore e Rusisë rrëzoi të gjithë dronët mbi rajonin e Moskës midis orës 7 të mëngjesit dhe 10 të mëngjesit të së dielës, sipas Ministrisë së Mbrojtjes ruse.
Përshkallëzimi i goditjeve me dronë vjen pak ditë pasi presidenti i rizgjedhur në krye të SHBA, Donald Trump telefonoi Putinin duke e këshilluar këtë të fundit që të mos përshkallëzonte konfliktin në Ukrainë. Versus.al
