Australia ka njoftuar një prej investimeve më të mëdha strategjike në historinë e saj ushtarake: 6.8 miliardë euro do të shpenzohen gjatë dekadës së ardhshme për të modernizuar kantierin detar të Henderson, afër qytetit Perth, në Australinë Perëndimore. Qëllimi? Ndërtimi i një flote të re të nëndetëseve me propulsion bërthamor, në bashkëpunim me Shtetet e Bashkuara dhe Mbretërinë e Bashkuar.
Ministri australian i Mbrojtjes, Richard Marles, e quajti këtë hap një "gur themeli" për të ardhmen e sigurisë kombëtare dhe rajonale. “Ky investim do të krijojë mijëra vende pune dhe do të përforcojë fuqinë detare të Australisë për dekada”, deklaroi ai.
Vendimi vjen si pjesë e marrëveshjes AUKUS, një aleancë tripalëshe e krijuar në vitin 2021 midis Australisë, SHBA-së dhe Britanisë së Madhe, me synimin për të përballuar ndikimin në rritje të Kinës në rajonin Azi-Paqësor.
Sipas planit: Australia do të blejë 3 deri në 5 nëndetëse bërthamore të klasit Virginia nga Shtetet e Bashkuara brenda 15 viteve të ardhshme.
Më pas, vendi do të fillojë ndërtimin e nëndetëseve të veta bërthamore, në bashkëpunim me teknologjinë britanike dhe amerikane.
Ndërtimi i kësaj flote të sofistikuar përfaqëson një kthesë radikale në politikat mbrojtëse të Australisë, duke e vendosur atë mes fuqive më të avancuara teknologjikisht në oqeanin Paqësor. Kjo gjithashtu sinjalizon një erë të re për rivalitetin global në këtë zonë, e cila po shndërrohet gjithnjë e më shumë në një teatër të tensioneve gjeopolitike.
Në horizont është jo vetëm mbrojtja kombëtare, por edhe kontrolli strategjik i rrugëve detare, burimeve natyrore dhe ndikimit rajonal.
