Vrasja e liderit të Hezbollahut, Hasan Nasrallah nga ana e forcave izraelite, ka shkaktuar një kaos total në Lindjen e Mesme. Së fundmi Irani ka kërkuar një mbledhje urgjente të Këshillit të Sigurimit të OKB-së pas vdekjes së Nasrallah.
Nëpërmjet një letre, ambasadori iranian Amir Saeid Iravani ka bërë apel për marrjen e masave të menjëhershme për të ndaluar agresionin izraelit dhe për të parandaluar që rajoni të bjerë në luftë totale.
Ndërkohë, Izraeli ka vijuar me sulmet ndaj objektivave të grupit të Hezbollahut në territorin libanez. Kryeministri izraelit, Benjamin Netanyahu reagoi për vrasjen e Nasrallah duke e cilësuar si “larje hesapesh” dhe hakmarrjen për vrasje të cilat ai i ka kryer ndaj shtetasve izraelitë dhe europianë.
Më herët të shtunën, zëdhënësi i Forcave të Mbrojtjes të Izraelit, Peter Lerner, tha se ushtria po përgatitej për mundësinë e një inkursioni tokësor, por ishte vetëm një opsion që po shqyrtohej. Qëllimi i deklaruar i Izraelit është të kthejë më shumë se 60,000 banorë në shtëpitë e tyre në Izraelin verior pranë kufirit me Libanin. Versus.al
