Ushtruesja e detyrës së presidentit të Kosovës, Albulena Haxhiu, ka shpallur 7 qershorin si datë për mbajtjen e zgjedhjeve të parakohshme parlamentare në vend, të cilat do të jenë të tretat brenda rreth një viti e gjysmë.
Vendimi u bë publik pas një takimi që Haxhiu zhvilloi me liderë dhe përfaqësues të partive politike, ku u diskutua për përcaktimin e datës së zgjedhjeve.
“Pasi dëgjova propozimet e partive politike dhe pas vlerësimit të afateve kushtetuese, nevojave organizative të KQZ-së dhe rëndësisë së pjesëmarrjes sa më të gjerë të qytetarëve në këtë proces, kam vendosur që zgjedhjet e parakohshme për Kuvendin e Kosovës të mbahen më 7 qershor”, deklaroi Haxhiu.
Sipas saj, 15 nga 17 partitë e ftuara morën pjesë në takim, ku u diskutuan dy data të mundshme, 31 maj dhe 7 qershor.
Edhe përfaqësues të disa prej partive kryesore kanë bërë të ditur pas takimit se janë dakordësuar që zgjedhjet e reja të zhvillohen më 7 qershor.
/Versus.al
