Një ngjarje e rëndë ka shokuar kryeqytetin e Kosovës, Prishtinën, pasi polici Alban Tolaj është gjetur i vdekur në rrugën "Ahmet Korenica".
Sipas burimeve të policisë, trupi i tij u zbulua rreth orës 14:45, ndërsa hetuesit po shqyrtojnë rrethanat e vdekjes.
Zëdhënësi i Policisë së Kosovës për Prishtinën, Agron Borovci ka konfirmuar se dyshimet e para flasin për vetëvrasje, por rasti po hetohet në detaje.
“Rreth orës 14:45, kemi pranuar informatën për një trup të pa jetë, në rrugën ‘Ahmet Korenica’ në Prishtinë. Policia menjëherë ka dalë në vendin e ngjarjes si dhe mjekët emergjent të cilët kanë konstatuar vdekjen e viktimës, mashkull, 47 vjeç, zyrtar policor.
Mbështetur në informacionet e para nga vendi i ngjarje, përkundër që ka elemente që sugjerojnë për vetëvrasje, policia në koordinim me prokurorin e shtetit ka nisur një hetim mbi vdekjen dhe me kujdes të shtuar po shqyrton të gjitha aspektet e rastit për ndriçimin e plotë të rrethanave të kësaj ngjarje tragjike”, është shprehur Agron Borovci.
Mediat në Kosovë kanë arritur të konfirmojnë se viktima, Alban Tolaj është babai i prezantueses së njohur atje, Elsa Tolaj./Versus.al
