Presidenti rus Vladimir Putin është gati të diskutojë paqen me Ukrainën, por vetëm nën kushte të ashpra, raporton agjencia londineze Reuters, duke cituar tre burime ruse me njohuri mbi negociatat. Sipas tyre, Kremlini kërkon që Kievi të pranojë neutralitetin ushtarak, të përjashtojë me shkrim anëtarësimin në NATO dhe të nisë një proces për heqjen graduale të sanksioneve perëndimore.
Putin kërkon garanci të qarta nga fuqitë e mëdha perëndimore për ndalimin e zgjerimit të NATO-s drejt lindjes, duke përfshirë edhe Ukrainën, Gjeorgjinë, Moldavinë dhe ish-republika të tjera sovjetike. Këto kushte, sipas burimeve, janë vendimtare për arritjen e një marrëveshjeje.
Ndërkohë, ish-presidenti amerikan Donald Trump, i cili ka shprehur dëshirën për t’i dhënë fund luftës, raportohet se është zhgënjyer nga mungesa e angazhimit të drejtpërdrejtë të Putinit, duke e akuzuar Kremlinin se “po luan me zjarrin” për shkak të intensifikimit të ofensivës ruse në lindje të Ukrainës.
Në një telefonatë dy-orëshe me udhëheqësin amerikan, Putin është shprehur i gatshëm të punojë për një memorandum paqeje, i cili do të përfshinte një afat kohor për armëpushimin dhe kornizën e një marrëveshjeje. Megjithatë, Moska thuhet se ende nuk ka përfunduar draftin e saj, duke lënë gjithçka pezull.
Burimet perëndimore dhe ukrainase akuzojnë Rusinë për zvarritje të qëllimshme, me qëllim që të fitojë më shumë territor në terren para çdo kompromisi diplomatik. Një zyrtar rus për Reuters theksoi: “Putini është gati për paqe, por jo me çdo çmim. Nëse nuk i imponohet marrëveshja, ai do të kërkojë ta diktojë përmes fitoreve në fushëbetejë.”
Kremlini nuk ka komentuar zyrtarisht mbi raportimet, ndërsa Ukraina dhe NATO vazhdojnë të mbajnë një qëndrim të pandryshuar, duke e konsideruar politikën e "dyerve të hapura" të Aleancës si të panegociueshme, pavarësisht presioneve nga Moska. Versus.al
