SHBA – Shtetet e Bashkuara përjetuan të shtunën më 18 tetor një nga lëvizjet më të mëdha protestuese të viteve të fundit, ndërsa miliona qytetarë dolën në rrugë në kuadër të fushatës “No Kings” (Pa Mbretër), për të protestuar kundër rikthimit në pushtet të ish-presidentit Donald Trump dhe politikave të tij të cilësuara nga organizatorët si autoritare, fashiste dhe anti-demokratike.
Sipas organizatorëve, në të gjithë vendin u mbajtën mbi 2,700 protesta, të shpërndara në çdo shtet të SHBA-së, me pjesëmarrje që shkon në rreth 7 milionë vetë. Kjo shënon një nga mobilizimet më të mëdha qytetare që nga protestat e viteve 2020.
“Kjo nuk është Amerika që njohim”
Në Washington D.C., mbi 10 mijë protestues mbushën sheshet kryesore, në një atmosferë të ngarkuar me emocione dhe simbolikë politike. “Po e shkatërrojnë demokracinë”, deklaroi për mediat amerikane një student i shkollës së mesme, Isaac Harder. “Kjo nuk është Amerika, ky është fashizëm”.
Tubime madhështore u zhvilluan edhe në qytete si New York, ku sipas policisë lokale morën pjesë mbi 100 mijë persona, si dhe në Chicago, Los Angeles, Portland dhe San Francisco.
Protestuesit mbanin postera dhe pankarta ku Trump paraqitej si diktator. Disa prej tyre e vizatonin me mustaqet e Hitlerit, të tjerë si përkrahës i Putinit, ndërsa mesazhi dominues ishte: “Amerika nuk ka mbretër”.
Humori si mjet rezistence
Në disa qytete, protestat u karakterizuan edhe nga një atmosferë simbolike dhe kreative. Protestues të veshur si pinguinë, hipopotamë apo karavidhe përdorën humorin për të përçuar një mesazh të fortë politik. Në Houston, qytet tradicionalisht konservator, u panë pankarta si: “Luftoni injorancën, jo emigrantët”, një mesazh i drejtpërdrejtë kundër politikave anti-imigracion të administratës Trump.
Përplasje dhe ndërhyrje policore
Jo të gjitha protestat kaluan paqësisht. Në Los Angeles, policia përdori gaz lotsjellës për të shpërndarë një grup prej 100 personash që, sipas autoriteteve, tentuan të hyjnë në një zonë të ndaluar. Në Portland, ku pjesëmarrja arriti rreth 40 mijë protestues, pati përplasje me agjentë federalë që ndodheshin në godinat e shërbimeve të imigracionit.
Organizatorët e lëvizjes “Pa Mbretër” u distancuan nga çdo veprim i dhunshëm, duke theksuar se qëllimi i tyre mbetet “të nxisin vetëdijen qytetare dhe të mbrojnë institucionet demokratike”.
Kush është lëvizja “No Kings”?
“No Kings” është një koalicion qytetar, i përbërë nga dhjetëra organizata joqeveritare, aktivistë dhe qytetarë të zakonshëm që kundërshtojnë qasjen autoritare të pushtetit dhe synojnë të mbrojnë Kushtetutën amerikane. Në deklaratat e tyre, ata e shohin rikthimin në pushtet të Donald Trump si një kërcënim real për liritë themelore dhe rendin demokratik në SHBA.
Lëvizja ka organizuar më parë protesta të mëdha, si ajo në qershor të këtij viti, ku sipas organizatorëve morën pjesë rreth 5 milionë qytetarë.
Përballë këtij mobilizimi masiv, përfaqësues të Partisë Republikane e kanë cilësuar lëvizjen si “një marshim urrejtjeje ndaj Amerikës”. Disa zëra më ekstremë e kanë krahasuar protestën me “akt terrorist”, ndërsa vetë Donald Trump nuk ka bërë ende një koment zyrtar.
Megjithatë, për protestuesit, kjo nuk është çështje partie apo ideologjie: “Kjo është një çështje e mbrojtjes së demokracisë”, theksoi një prej organizatorëve në Nju Jork.
Lëvizja “Pa Mbretër” ka paralajmëruar se nuk do të ndalet me kaq. Ata kanë në plan të organizojnë fushata edukative, takime komunitare dhe presion publik ndaj institucioneve, me synimin për të “ruajtur themelet demokratike” dhe për të “ndaluar normalizimin e autoritarizmit”.
