Pas disa javësh deklaratash të pandërprera kundër Danimarkës, Groenlandës dhe aleatëve evropianë të Shteteve të Bashkuara, Donald Trump njoftoi më 21 janar "kornizën e një marrëveshjeje të ardhshme" mbi Groenlandën pas një takimi me Mark Rutte, sekretarin e përgjithshëm të NATO-s, në Forumin Ekonomik Botëror në Davos të Zvicrës. Të mërkurën, më 11 shkurt, një ditë para një takimi të ministrave të mbrojtjes së NATO-s në Bruksel, Rutte, ish-kryeministri holandez, njoftoi nisjen e "Arctic Sentry", një operacion i përforcuar mbikëqyrjeje në rajon që synonte adresimin e shqetësimeve të presidentit amerikan.
Nisma e re do të "përdorte forcën e NATO-s për të mbrojtur territorin tonë dhe për të siguruar që Arktiku dhe Veriu i Epërm të mbeten të sigurta", tha të mërkurën gjenerali Alexus Grynkewich, komandanti suprem i aleatëve të NATO-s. "Për herë të parë tani, ne do të bashkojmë gjithçka që bëjmë në Arktik nën një komandë", shtoi Rutte.
Më konkretisht, të gjitha stërvitjet ushtarake që vende të ndryshme të NATO-s kishin planifikuar tashmë në zonë, si dhe burimet e reja të mbikëqyrjes të vendosura në Arktik, do të koordinohen në komandën e NATO-s në Norfolk në shtetin amerikan të Virxhinias. Disa vende kanë njoftuar tashmë dërgimin e burimeve të reja në Arktik, siç është Mbretëria e Bashkuar, e cila do të dyfishojë kontingjentin që ka vendosur në Norvegji, duke shkuar nga 1,000 në 2,000. Versus.al
