Kryeministri i Kosovës, Albin Kurti ka thënë se elita politike në Beograd nuk ka hequr dorë nga projekti i Serbisë së Madhe. Kurti thotë se Vuçiç thjesht po e mashtron Perëndimin.
Kryeministri i Kosovës, Albin Kurti në një intervistë për gazetën zviceriane NNZ ka folur lidhur me dialogun me Serbinë duke deklaruar se presidenti serb dhe elita politike e Beogradit nuk ka hequr dorë nga projekti i “Serbisë së Madhe”.
“Vuçiç thjesht po mashtron Perëndimin. Elita që dominon vendin nuk ka hequr dorë kurrë nga projekti i Serbisë së Madhe. Thjesht quhet diçka ndryshe tani, domethënë ‘Bota Serbe’”. Kjo do të thotë bashkim i të gjithë serbëve në një vend. Kjo do të nënkuptonte shpërbërjen e Bosnje-Hercegovinës, Malit të Zi dhe Kosovës”, u shpreh Kurti.
Ndër të tjera kryeministri shqiptar tha se Vuçiç vetëm po pret momentin e duhur duke pasur si qëllim hakmarrjen dhe një tjetër pushtim të Kosovës.
Thjesht duhet të dëgjoni me kujdes se çfarë po thotë Vuçiç, vazhdon Kurti. “Për shembull, kur bëhet fjalë për Kaukazin e Jugut. Në vitin 2023, presidenti serb vlerësoi veprimet e Azerbajxhanit për “kthimin në shtëpi” të Nagorno-Karabakut. Zona shpalli në mënyrë të njëanshme pavarësinë në 1991. Presidenti i Azerbajxhanit Ilham Aliyev më pas mori kohën e tij. Ai u përqendrua në zhvillimin e ekonomisë dhe riarmatosi sistematikisht ushtrinë. Vetëm kur situata gjeopolitike e lejoi, ai goditi dhe rifitoi zonën. Durimi, sipas Vuçiçit, shpërblehet. Kjo është pikërisht ajo që Vuçiç dëshiron të bëjë me Kosovën”, thotë Kurti.
Në mbyllje të përgjigjes për këtë pyetje, Kurti tha se Kosova duhet të jetë e përgatitur për çdo skenar të mundshëm. Versus.al
