Kosovë- Një efektiv i policisë i identifikuar si Muhamet Lika, është vrarë me armë zjarri mbrëmjen e djeshme në Kaçanik.
Mësohet se ngjarja ka ndodhur rreth orës 23:00 në rrugën “Idriz Seferi” teksa polici po hynte në banesën e tij.
Zëdhësi i policisë për Ferizajn, Kanun Veseli ka bërë me dije se polici u gjet në gjendje të rëndë pranë hyrjes në banesën e tij dhe më pas ndërroi jetë në spital për shkak të plagëve të marra.
“Kemi pranuar një informacion se një person është plagosur dhe gjendet në gjendje të rëndë në hyrje të ndërtesës së tij, në rrugën “Idriz Seferi” në Kaçanik. Në vendngjarje, përveç njësive policore, ka dalë edhe ekipi i emergjencës së Kaçanikut, të cilët e kanë transportuar në Qendrën e Mjekësisë në Kaçanik. Si pasojë e plagëve të marra, pjesëtari i Policisë ka ndërruar jetë, kjo është konstatuar nga mjekët në këtë qendër”, ka deklaruar Veseli.
Grupi hetimor po merret me ekzaminimin e provave në vendngjarje, ndërsa autori ende nuk është identifikuar, për pasojë as shkaqet e ngjarjes nuk dihen.
Vrasja e policit pason një sërë ngjarjes kriminale të ndodhura në Kosovë së fundmi për të cilat ka reaguar edhe kryeministri Albin Kurti i cili ka kërkuar reflektim në shoqëri dhe vëmendje më të madhe të autoriteteve shtetërore. Versus.al
