Numri i njerëzve të vdekur në Mianmar pas tërmetit të fuqishëm me magnitudë 7.7 të së premtes, mund të arrijë në 10.000 persona.
Numri aktual i të vdekurve është 1,700 me 3,400 të tjerë të lenduar dhe 300 të zhdukur, sipas kanaleve pro-juntës në Telegram, duke cituar sundimtarët ushtarakë.
Por modelimi parashikues i Shërbimit Gjeologjik të SHBA vlerëson se kjo shifër do të rritet me mijëra dhe mund të arrijë në 10,000.
Ai thotë gjithashtu se humbjet financiare mund të tejkalojnë prodhimin vjetor ekonomik të vendit.
Tërmeti i Mianmarit ishte një nga më të fortët e vendit në një shekull, tha qeveria e tij ushtarake.
Ndërsa ekipet e shpëtimit të emergjencës kanë filluar të operojnë në zonën më të goditur nga tërmeti, përpjekjet janë penguar nga rrugët e dëmtuara, urat e rrëzuara, komunikimet e dobëta dhe sfidat e operimit në një vend në mes të një lufte civile. Shumë zona ende nuk janë arritur.
Tërmeti goditi rreth orës 12:50 me orën lokale pranë Mandalay, qyteti i dytë më i madh i Mianmarit, në një thellësi të cekët prej gjashtë miljesh.
Shumica e shpëtimeve ndodhin brenda 24 orëve të para pas një fatkeqësie, me shanset për mbijetesë që zvogëlohen me kalimin e çdo dite.
Tajlanda fqinje u trondit gjithashtu, duke përfshirë kryeqytetin Bangkok, ku u humbën jetën 17 njerëz, duke përfshirë disa që vdiqën kur një rrokaqiell në ndërtim e sipër u shemb. Të paktën 78 persona mbetën të bllokuar nën rrënoja.
Dymbëdhjetë shtetas kinezë janë në mesin e të lënduarve, sipas mediave shtetërore kineze.
Një raport fillestar mbi përpjekjet për lehtësimin e tërmetit, i lëshuar të shtunën nga Zyra e OKB-së për Koordinimin e Çështjeve Humanitare, vuri në dukje dëme të rënda ose shkatërrime të shumë objekteve shëndetësore në Mianmar.
Dhe paralajmëroi se një “mungesë e madhe e furnizimeve mjekësore po pengon përpjekjet e reagimit, duke përfshirë qeset e gjakut, anestetikët, pajisjet ndihmëse, ilaçet thelbësore dhe tendat për punonjësit e shëndetësisë”.
India, Kina dhe Tajlanda janë ndër fqinjët që kanë dërguar materiale dhe ekipe ndihme, së bashku me ndihmën dhe personelin.
Qeveria e Mbretërisë së Bashkuar ka njoftuar një paketë prej 10 milionë funtesh për të mbështetur popullin e Mianmarit pas tërmetit.
Përpjekjet e shpëtimit në Mianmar, e cila njihet edhe si Burma, po ndërlikohen nga lufta e përgjakshme civile që ka shkatërruar pjesën më të madhe të vendit, duke përfshirë zonat e prekura nga tërmeti.
Në vitin 2001, ushtria mori pushtetin nga qeveria e zgjedhur e Aung San Suu Kyi, e cila nga ana tjetër shkaktoi rezistencë të armatosur.
Forcat qeveritare kanë humbur kontrollin e pjesës më të madhe të Mianmarit, dhe shumë vende janë të rrezikshme ose të pamundura për t’u arritur nga grupet e ndihmës.
Më shumë se tre milionë njerëz janë zhvendosur nga luftimet dhe gati 20 milionë janë në nevojë, sipas Kombeve të Bashkuara.
