Një 21-vjeçar norvegjez, Mads Mikkelsen, ka treguar se është ndaluar, marrë në pyetje dhe më pas dëbuar nga Shtetet e Bashkuara, pasi oficerët e emigracionit në aeroportin e Newarkut, New Jersey, zbuluan në telefonin e tij një meme që tallte zëvendëspresidentin amerikan JD Vance.
Mikkelsen mbërriti në SHBA më 11 qershor me qëllim që të kalonte pushime, por planet e tij u ndërprenë menjëherë kur u ndalua në kontrollin kufitar dhe u mbajt në një qeli. Ai i tha medias norvegjeze Nordlys se ishte viktimë e “abuzimit me pushtetin dhe ngacmimit të padrejtë”.
Sipas tij, oficerët i bënë pyetje pa lidhje si “A je përfshirë në trafik droge, akte terroriste apo ekstremizëm të djathtë?” dhe më pas, me kërcënime, i kërkuan fjalëkalimin e telefonit. Në telefonin e tij u gjet një meme ku JD Vance paraqitej pa flokë, dhe kjo ishte arsyeja për dëbimin e tij nga vendi të njëjtën ditë.
Ky rast vjen pas një incidenti tjetër, ku shkrimtari australian Alistair Kitchen, 33 vjeç, u ndalua në Los Angeles më 12 qershor gjatë një ndalese transiti për në Nju Jork. Ai u mbajt për 12 orë dhe më pas u kthye në Melburn, duke pretenduar se arsyeja e ndalimit ishin qëndrimet e tij politike për konfliktin në Gaza dhe artikujt e tij në mbështetje të protestave pro-palestineze në universitetin Columbia.
Ndërkaq, Departamenti Amerikan i Sigurisë Kombëtare ka mohuar këto pretendime, duke i cilësuar si “plotësisht të pavërteta”. /Versus.al
