SHBA- Presidenti Donald Trump ka nënshkruar një urdhër ekzekutiv që sanksionon Gjykatën Ndërkombëtare Penale, duke e akuzuar atë për veprime të paligjshme kundër aleatit të ngushtë Izraelit.
Masa vendos kufizime financiare dhe të vizave për individët dhe familjet e tyre që ndihmojnë në hetimet e kësaj gjykate ndaj qytetarëve ose aleatëve amerikanë.
Trump nënshkroi masën ndërsa kryeministri izraelit Benjamin Netanyahu po vizitonte Uashingtonin.
Nëntorin e kaluar, Gjykata Ndërkombëtare lëshoi një urdhër arresti për Netanyahun për krime të dyshuara lufte në Gaza, të cilat Izraeli e mohon. Gjykata lëshoi gjithashtu një urdhër për një komandant të Hamasit.
Institucioni i sanksionuar është një gjykatë globale me fuqinë për të ngritur ndjekje penale për gjenocid, krime kundër njerëzimit dhe krime lufte. Vitet e fundit, ajo ka lëshuar gjithashtu urdhër-arreste për presidentin rus Vladimir Putin për krime të dyshuara lufte në Ukrainë, liderët talebanë për "persekutimin e vajzave dhe grave afgane" dhe liderin ushtarak të Mianmarit për krime kundër muslimanëve Rohingya.
Më shumë se 120 vende janë anëtarë të gjykatës, duke përfshirë Britaninë e Madhe dhe shumë vende evropiane, por SHBA dhe Izraeli nuk janë.
Holanda, ku ndodhet edhe selia e gjykatës ndërkombëtare shprehu keqardhje për urdhrin e Trump.
"Puna e gjykatës është thelbësore në luftën kundër mosndëshkimit," tha Ministri i Jashtëm holandez Caspar Veldkamp në X.
Një memo e Shtëpisë së Bardhë e qarkulluar të enjten akuzoi gjykatën me bazë në Hagë për krijimin e një "ekuivalence të turpshme morale" midis Hamasit dhe Izraelit duke lëshuar urdhra në të njëjtën kohë.
Urdhri ekzekutiv i Trump tha se veprimet e fundit të gjykatës "vendosën një precedent të rrezikshëm" që rrezikoi amerikanët duke i ekspozuar ata ndaj "ngacmimeve, abuzimeve dhe arrestimeve të mundshme".
“Kjo sjellje keqdashëse nga ana tjetër kërcënon të cenojë sovranitetin e Shteteve të Bashkuara dhe minon punën kritike të sigurisë kombëtare dhe politikës së jashtme të qeverisë së Shteteve të Bashkuara dhe aleatëve tanë, përfshirë Izraelin”, thuhet në urdhrin e firmosur.
SHBA nuk është anëtare e institucionit ndërkombëtar dhe ka refuzuar në mënyrë të përsëritur çdo juridiksion nga organi mbi zyrtarët ose qytetarët amerikanë. Versus.al
