Një situatë alarmante po përjetohet në Evropën Jugperëndimore, ku zjarret masive kanë përfshirë zona të mëdha në Spanjë dhe Francë, duke shkaktuar dëme të konsiderueshme në mjedis dhe duke detyruar autoritetet të ndërmarrin operacione të mëdha evakuimi.
Në Spanjë, flakët kanë përfshirë disa zona, përfshirë rajonet e Madridit dhe Avilës, ku sipërfaqja e djegur ka kaluar mbi 250 mijë hektarë tokë. Përhapja e shpejtë e zjarreve është favorizuar nga temperaturat e larta, thatësira dhe erërat e forta, duke vështirësuar punën e ekipeve të emergjencës.
Ndërkohë, në Francë situata më kritike paraqitet në rajonin e Bordeaux dhe veçanërisht në zonën e Girondës, ku zjarret kanë shkrumbuar sipërfaqe të mëdha dhe dëmet po rriten nga ora në orë.
Për shkak të rrezikut të madh, autoritetet franceze dhe spanjolle kanë nisur operacione masive evakuimi. Rreth 270 mijë persona janë larguar nga banesat e tyre për t’i shpëtuar përparimit të flakëve.
Me burimet lokale të tejkaluara nga përmasat e emergjencës, Franca dhe Spanja kanë kërkuar ndihmë përmes mekanizmave evropianë të emergjencës, me qëllim shtimin e forcave tokësore dhe ajrore për luftën kundër zjarreve.
Një moment dramatik është regjistruar në zonën Cap-Ferret, pranë Bordeaux, ku një ekip televiziv u përball me një situatë të rrezikshme gjatë raportimit në terren.
Gazetarja që po raportonte për dëmet e shkaktuara nga zjarret në Girondë ndodhej pranë një zone ku flakët kishin arritur te një bombol gazi. Pak çaste më vonë, bombola shpërtheu duke shkaktuar një zhurmë të fuqishme dhe një valë goditëse që tronditi ekipin e xhirimit.
Kamera ka kapur momentin e shpërthimit, përpara se transmetimi të ndërpritej menjëherë për arsye sigurie dhe gazetarët të largoheshin nga zona e rrezikut.
Autoritetet vijojnë betejën me flakët, ndërsa ekipet e zjarrfikësve po përpiqen të frenojnë përhapjen e zjarreve që konsiderohen ndër më të rëndat e viteve të fundit në rajonin e Evropës Jugperëndimore./Versus.al
