Presidenti i Serbisë, Aleksandar Vuçiç, ka deklaruar mundësinë e zgjedhjeve të parakohshme parlamentare, si përgjigje ndaj valës së protestave të studentëve që kanë përfshirë Beogradin dhe disa qytete të tjera të vendit gjatë javës së fundit.
Protestat, të cilat kanë marrë përmasa të mëdha, janë organizuar kryesisht nga studentë universitarë, të cilët akuzojnë qeverinë për mungesë transparence, kontroll politik mbi arsimin, si dhe përpjekje për të shtypur lirinë akademike dhe shprehjen e lirë.
Gjatë një daljeje publike të enjten mbrëma, Vuçiç deklaroi:
“Nëse kjo është vullneti i popullit dhe nëse dikush tjetër beson se mund të qeverisë më mirë Serbinë, atëherë le të shkojmë në zgjedhje. Të vendosë populli.”
Sipas presidentit, zgjedhjet mund të mbahen brenda këtij viti, duke lënë të hapur mundësinë që ato të zhvillohen që në vjeshtën e 2025-ës, nëse tensionet nuk zbuten.
Organizatorët e protestave, të cilët po fitojnë gjithnjë e më shumë mbështetje nga qytetarët dhe disa figura opozitare, e kanë cilësuar paralajmërimin si një manovër politike për të fituar kohë dhe për të shmangur përballjen me kërkesat konkrete të studentëve.
Ndërkohë, komuniteti ndërkombëtar dhe organizatat për të drejtat e njeriut po ndjekin me shqetësim zhvillimet në Serbi, duke bërë thirrje për respektim të të drejtave themelore dhe për një dialog të hapur mes qeverisë dhe përfaqësuesve të protestuesve. /Versus.al
