Durrës- Sot është hapur gara për ndërtimin e portit të ri të qytetit bregdetar, në Porto Romano. Në garë janë 5 kompani ndërkombëtare të cilat do të paraqesin projektet e tyre për portin që pritet të jetë dy herë më i thellë sesa ai aktuali.
Fjala hapëse u mbajt nga zëvendës kryeministrja, Belinda Balluku e cila tha se porti do t’i shërbejë edhe vendeve të tjera të rajonit, ndërsa nuk la pa thumbuar edhe opozitën e cila vazhdimisht e akuzonte qeverinë për projektet “3D” të cilat sipas tyre nuk zbatoheshin.
“Ky port do jetë dyfish më i thellë dhe do u shërbejë edhe vendeve të tjera të rajonit. 5 nga kompanitë që kanë shprehur interes, janë ndër më prestigjozet në Evropë. Duam të ndërtojmë një terminal kontejnerësh treefish më të madh, të gjelbër dhe të automatizuar. Durrësi me dy porte, nuk është më një ëndërr por një realitet. Nëse dikur na paragjykonin për 3D-të, ka ca muaj që nuk e dëgjoj më këtë historinë e 3D-ve. Ndoshta qëkur mbaruam aeroportin e Kukësit, tashmë askush nuk mund të flasë më për premtime elektorale”- u shpreh Balluku.
Ndërtimi i portit të ri tregtar në Porto Romano parashikohet të përfundojë brenda vitit 2028 dhe kostoja totale pritet të shkojë deri në 392 milionë euro.
I pranishëm gjatë prezantimit të projekteve nga firmat ndërkombëtare në garë, ishte edhe kryeministri Edi Rama dhe drejtori i Portit të Durrësit, Piro Vengu i cili nga pasditja e sotme pritet të dekretohet si ministër i ri i Mbrojtjes duke zëvendësuar Niko Peleshin. Versus.al
