Përmirësimi i vlerësimeve në luftën kundër pastrimit të parave do të jetë qëllimi kryesor i strategjisë kombëtare të hartuar për këtë fushe dhe që do të zbatohet për 6 vitet e ardhshme. Për zv.kryeministren Belinda Balluku pjesë e këtij procesi është edhe sektori privat.
“Në hartimin e strategjisë, një vëmendje të veçantë i është dhënë bashkëpunimit të ngushtë me sektorin privat, si bankat, noterët, audituesit, ndërmjetësusesit, zyrat e këmbimit valutor, shoqatat e ndërtuesve, të cilët janë angazhuar plotësisht në procesin e hartimit të këtij dokumenti dhe konsultimit të kësaj strategjie në publik.”
Balluku kërkoi nga institucionet përgjegjëse përkushtim maksimal në mënyrë që vlerësimi i radhës së MONEYVAL për Shqipërinë të ruajë trendin pozitiv tashmë të konsoliduar.
“Masat për të cilat kërkohet vëmendje juaj në veçanti janë: Angazhimi i stafeve me njohuri të fushës, për t’ju përgjigjur në kohë kërkesave të ekspertëve vlerësues. Në këtë kontekst, qëndrueshmëria e stafit është gjithashtu një aspekt i rëndësishëm që duhet të mbahet në konsideratë nga të gjithë drejtuesit. Evidentimi me qartësi i nevojave buxhetore për ngritjen e sistemeve dhe rritjen e kapaciteteve institucionale, në mënyrë që t’i adresojmë në kohë, në koordinim edhe me partnerët ndërkombëtarë.”
Pjesë e mbledhjes së Komitetit të Bashkërendimit të Luftës Kundër Pastrimit të Parave ishin edhe ministri i Brendshëm Taulant Balla, ai i Drejtësisë Ulsi Manja dhe Guvernatori i Bankës së Shqipërisë Gent Sejko.
