Ish-presidenti Ilir Meta ka reaguar përmes një postimi në rrjetet sociale pas seancës së zhvilluar këtë të hënë në GJKKO, ku u vendos që ai dhe ish-bashkëshortja e tij Monika Kryemadhi të gjykohen në të njëjtin proces, ndërsa për tre të pandehurit e tjerë u pranua gjykimi i shkurtuar.

Në reagimin e tij, Meta pretendon se gjatë seancës Prokuroria ka rrëzuar akuzën kryesore që lidhej me lobimin e pretenduar prej 1 milion dollarësh për një foto me ish-presidentin amerikan Donald Trump.

“Sot, në seancën e radhës të gjykimit në themel, vetë Prokuroria rrëzoi akuzën kryesore ndaj meje për gjoja lobimin 1 milion USD për një foto me Presidentin Trump”, shkruan Meta.

Sipas tij, prokurori ka pohuar në sallën e gjyqit se bëhet fjalë vetëm për një pagesë prej 15 mijë dollarësh për kompaninë McKeon Group, pagesë që Meta e cilëson të ligjshme dhe që, sipas tij, është deklaruar prej vitesh publikisht dhe para SPAK.

Ish-kreu i shtetit sulmoi gjithashtu mediat e huaja që kanë raportuar mbi çështjen, duke përmendur artikuj të publikuar nga Mother Jones dhe Kronen Zeitung, të cilat ai i cilësoi si “lajme të rreme”.

Meta shtoi se akuzat ndaj tij do të “çmontohen njëra pas tjetrës”, ndërsa prej 19 muajsh, sipas tij, mbahet në “izolim politik”.

SPAK ka marrë të pandehur Ilir Metën dhe Monika Kryemadhin për korrupsion, pastrim parash dhe fshehje pasurie, në lidhje me çështjen CEZ-DIA dhe lobimin e ish-LSI-së në SHBA.

Në GJKKO u zhvillua seanca e dytë në themel ndaj Ilir Meta dhe Monika Kryemadhi, proces që vijon të shoqërohet me debate mes palëve dhe vendime procedurale të gjykatës.

Gjatë seancës, gjykata vendosi të rrëzojë kërkesën e mbrojtjes së Ilir Metës për transmetim live të procesit gjyqësor, me argumentin se publikimi i drejtpërdrejtë do të krijonte presion mediatik dhe publik mbi çështjen. Po ashtu, në sallë nuk u lejuan kamerat, duke vijuar praktika e kufizimit të transmetimit.

Në një tjetër zhvillim, gjykata vendosi të ndajë më vete dosjen për tre nga të pandehurit, duke pranuar kërkesën për gjykim të shkurtuar për Fatime Kryemadhi, Ema Çoku dhe Pirro Xhixho.

Ndërkohë, Monika Kryemadhi ka kërkuar që t’i vihen në dispozicion të gjitha përgjimet ambientale dhe telefonike të administruara nga SPAK, duke pretenduar mungesë të plotë të tyre në materialet e dorëzuara mbrojtjes.

Gjatë seancës, Ilir Meta u shpreh se nuk mban përgjegjësi për veprimet e ish-bashkëshortes së tij, duke theksuar se përgjegjësia penale është individuale.

“Unë kam statusin ‘i divorcuar’. Nuk mbaj përgjegjësi për veprimet e Kryemadhit pa dijeninë time. Më trego një shpenzim që kam bërë unë,” u shpreh Meta në sallën e gjyqit, duke shtuar se nuk i kushton rëndësi elementeve personale si provë.

Meta u shfaq sërish brenda kafazit prej xhami në sallën e gjyqit, çka u kundërshtua nga mbrojtja e tij, e cila e konsideron këtë masë si cënuese të dinjitetit njerëzor.

Seanca u zhvillua në një klimë të tensionuar procedurale, ndërsa çështja vijon të shqyrtohet në themel për akuzat e korrupsionit, pastrimit të parave dhe fshehjes së pasurisë ndaj ish-çiftit Meta–Kryemadhi.

Në GJKKO u zhvillua këtë të hënë seanca e dytë e gjykimit në themel ndaj Ilir Meta dhe Monika Kryemadhi.

Pas përfundimit të seancës, Kryemadhi foli shkurtimisht për mediat, duke komentuar me tone ironike atmosferën brenda sallës së gjyqit.

E pyetur nga gazetarët nëse kishte pasur tensione gjatë procesit, ajo u përgjigj:

“Nuk kishte tensione. I vetmi tension ishte se filloi të na pikojë kondicioneri te salla e re. E kam me të vërtetë”, tha Kryemadhi me batutë.

Gjatë seancës, Ilir Meta qëndroi në kafazin prej xhami të sigurisë, ndërsa Monika Kryemadhi ishte ulur përpara tij në sallë. Sipas asaj që u vu re gjatë procesit, Kryemadhi nuk e ktheu në asnjë moment kokën nga ish-bashkëshorti i saj.

Në një moment të seancës, Meta është parë duke përshëndetur mbështetësit dhe mediat me simbolin e dy gishtave, ndërsa më pas ka bërë edhe simbolin e shqiponjës me duar.

SPAK ka marrë të pandehur Ilir Metën dhe Monika Kryemadhin për korrupsion, pastrim parash dhe fshehje pasurie, në lidhje me çështjen CEZ-DIA dhe lobimin e ish-LSI-së në SHBA.

Ilir Meta ka reaguar në seancën gjyqësore në GJKKO, pasi përfaqësuesit e SPAK lexuan prova nga dosja hetimore që, sipas prokurorisë, faktojnë përgjegjësitë e tij dhe të Monika Kryemadhi për akuzat e ngritura ndaj tyre.

Gjatë fjalës së tij në sallën e gjyqit, Meta deklaroi se nuk mund të mbajë përgjegjësi për veprimet e ish-bashkëshortes, duke theksuar se përgjegjësia penale është individuale.

“Në respekt të gjykatës duhet të sqaroj: në seancën paraprake edhe zonja Gjoka e ka kuptuar këtë histori. Unë kam statusin ‘i divorcuar’. Unë mos të mbaj përgjegjësi çfarë ka bërë Kryemadhi në të kaluarën pa dijeninë time. Përgjegjësia ime është individuale. Më trego një shpenzim që kam bërë unë. Edhe orën e kam prej para 20 vitesh. Nuk u kushtoj shumë rëndësi këtyre”, u shpreh Meta.

Seanca në GJKKO vijon mes debateve të palëve lidhur me provat dhe kërkesat procedurale, ndërsa gjykata pritet të vendosë nëse do të pranojë kërkesën për gjykim të shkurtuar për tre të pandehurit e tjerë në dosje.

Bëhet fjalë për Ema Çoku, mikeshë e Monika Kryemadhit, si dhe nënën e kësaj të fundit, të akuzuara për pastrim parash, ndërsa Pirro Xhixho akuzohet për korrupsion.

SPAK ka marrë të pandehur Ilir Metën dhe Monika Kryemadhin për korrupsion, pastrim parash dhe fshehje pasurie, në lidhje me çështjen CEZ-DIA dhe lobimin e ish-LSI-së në SHBA.

Monika Kryemadhi ka folur në seancën gjyqësore ndaj Ilir Meta në GJKKO, ku ngriti shqetësime lidhur me provat dhe materialet hetimore të dorëzuara nga SPAK.

Gjatë fjalës së saj, Kryemadhi deklaroi se mbështet kërkesat e avokatit mbrojtës Kujtim Çakrani për mënyrën se si po mbahet Ilir Meta në sallën e gjyqit, brenda kafazit të qelqtë.

“Jam dakord me kërkesat e avokatit Çakrani. Sallat janë tipike amerikane, por ka një ndryshim, edhe vrasësit serialë atje ulen me avokatin përkrah”, u shpreh ajo.

Ish-deputetja tha gjithashtu se ka marrë një USB me prova nga akuza, por sipas saj materiali nuk hapet, duke kërkuar që t’i vihen në dispozicion të gjitha aktet dhe përgjimet e administruara në hetim.

“Kërkoj të merren masa të më vendoset siç duhet. Nuk më janë vënë në dispozicion aktet për çdo përgjim familjarëve”, deklaroi Kryemadhi.

Nga ana tjetër, përfaqësuesit e SPAK pranuan problemin teknik me USB-në, duke deklaruar se çështja do të zgjidhet.

“Do ta zgjidhim, do ta japim”, u shpreh prokuroria në sallë.

Debati vijoi edhe për përgjimet ambientale, ku Kryemadhi insistoi se në listën e provave përmenden mbi 20 përgjime, të cilat sipas saj mungojnë në materialet e dorëzuara mbrojtjes.

“Dua edhe përgjimet. Në listën e provave thuhet që ekzistojnë mbi 20 përgjime ambientale, kështu që duam t’i marrim. Në ato materiale nuk ekzistojnë”, tha ajo.

Nga ana e saj, gjykata sqaroi se nuk mund të vërë në dispozicion materiale që nuk i disponon, ndërsa theksoi se është detyrim i organit procedues që t’ua dorëzojë palëve të gjitha aktet hetimore.

Seanca gjyqësore ndaj Ilir Meta është shoqëruar edhe me momente komunikimi direkt nga salla e gjyqit, teksa trupa gjykuese ishte tërhequr për të shqyrtuar kërkesat e paraqitura nga palët.

Gjatë ndërprerjes së seancës, deputeti i Partia Demokratike, Bujar Leskaj, iu drejtua Metës nga salla me pyetjen:

“President, si je? Je i fortë?”

Nga kafazi i qelqtë i sigurisë, Ilir Meta u përgjigj:

“Jam mirë, jam i fortë.”

Më pas, ish-presidenti tentoi të përshëndeste edhe deputetin Flamur Noka dhe mbështetës të tjerë të pranishëm në sallë, por zëri i tij nuk u dëgjua qartë për shkak të izolimit akustik të kafazit.

Duke iu afruar xhamit, Meta tha me ironi:

“Akustika, akustika… xhami.”

Seanca e dytë në themel ndaj Ilir Meta është shoqëruar me debate në sallën e gjyqit, pasi mbrojtja kërkoi që procesi të transmetohej live për mediat dhe publikun. Kërkesa, e mbështetur edhe nga Monika Kryemadhi, u rrëzua nga gjykata me argumentin se transmetimi i drejtpërdrejtë do të krijonte presion publik dhe mediatik mbi procesin.

“Ky intimidim dhe linçim që më është bërë mua dhe ish-burrit tim duhet të jetë i hapur, që shqiptarët të shohin provat”, është shprehur Kryemadhi gjatë seancës.

Edhe avokati i Metës, Kujtim Çakrani, kundërshtoi vendimin e gjykatës, duke deklaruar se nuk ekziston asnjë bazë ligjore për ndalimin e transmetimit live të mediave.

“Ky është procesi i vitit. Mediat duhet ta transmetojnë live. Nuk keni asnjë bazë ligjore të ndërprisni transmetimin live”, u shpreh ai.

Gjatë seancës, Monika Kryemadhi kërkoi gjithashtu që t’i vihen në dispozicion të gjitha përgjimet ambientale dhe telefonike të kryera nga prokuroria. Ndërkohë, mbrojtja e Fatime Kryemadhit i kërkoi gjykatës të shprehet lidhur me kërkesën për përfitimin e gjykimit të shkurtuar.

Përveç Fatime Kryemadhit, kërkesë për gjykim të shkurtuar kanë paraqitur edhe Ema Çoku dhe Pirro Xhixho.

Në sallën e gjyqit ishte i pranishëm edhe Ilir Meta, i cili qëndroi brenda kafazit të qelqtë të sigurisë. Në seancë morën pjesë gjithashtu Monika Kryemadhi dhe Ema Çoku, ndërsa Pirro Xhixho dhe Fatime Kryemadhi u përfaqësuan nga avokatët e tyre mbrojtës.

Ish-presidenti është fotografuar duke komunikuar me shenja me mediat, për shkak të vështirësisë së komunikimit nga kafazi i sigurisë. Në mbështetje të tij, në sallën e gjyqit ishin të pranishëm edhe eksponentë të Partia Demokratike.

SPAK ka marrë të pandehur Ilir Metën dhe Monika Kryemadhin për akuzat e korrupsionit, pastrimit të parave dhe fshehjes së pasurisë, në lidhje me çështjen CEZ-DIA dhe lobimin e ish-LSI-së në SHBA.

Sot pritet që gjykata të vendosë nëse do të pranojë kërkesat për gjykim të shkurtuar të tre të pandehurve të tjerë në dosje.

Ilir Meta

Në Gjykatën e Posaçme ka nisur seanca e dytë në themel për ish-presidentin Ilir Meta, ish-bashkëshorten e tij Monika Kryemadhi dhe 3 të pandehurit e tjerë për dosjen e aferës CEZ-DIA dhe lobimin në SHBA për ish-LSI.

Pavarësisht mungesës së Fatime Kryemadhit dhe Pirro Xhixhos, seanca vijoi me praninë e avokatëve të tyre.

Mediat nuk u lejuan të qëndronin përgjatë seancës, por vetëm në momentet e para. Kreu i PL, Ilir Meta u shfaq brenda kafazit prej xhami nga ku përshëndeti mediat duke bërë shqiponjën me duar.

Fatime Kryemadhi, Pirro Xhixho dhe Ema Çoku janë të pandehurit që kanë kërkuar gjykim të shkurtuar. Ndërsa Meta dhe Kryemadhi kanë kërkuar gjykim me procedurë të zakonshme. 

Të dy akuzohen për të njëjtat vepra penale, korrupsion pasiv, pastrim parash dhe fshehje pasurie. Ish-çifti ka mohuar akuzat lidhur me dosjen në ngarkim të tyre duke e konsideruar procesin gjyqësor si tejet politik të drejtuar nga vetë kryeministri Edi Rama. Në seancën e kaluar ku u shfaq për herë të parë Ilir Meta pas mbi 1 viti e gjysmë paraburgim, pati shqetësime lidhur me shëndetin e tij për shkak të ndryshimit drastik në pamje. Versus.al

Sot në Gjykatën e Posaçme zhvillohet seanca e dytë e gjyqit në themel ndaj kreut të Partisë së Lirisë Ilir Meta. Ish-presidenti ka dorëzuar një deklarate ku thotë se nuk do të marrë pjesë se seancën ku do të diskutohet masa e sigurisë, por do të jetë i pranishëm në seancën ku do të zhvillohet gjyqi në themel.

Në sallën e gjyqit janë të pranishëm edhe Sekretari i Përgjithshëm i PD Flamur Noka, Sekretari i Përgjithshëm i PL, Tedi Blushi dhe deputeti Klevis Balliu të cilët shprehën shqetësim për gjendjen e kreut të PL gjatë seancës së parë të gjyqit në themel ku kamerat u lejuan vetëm për pak minuta dhe filmuan ndryshimin drastik në pamjen e Metës.

Seancën e kaluar, kreu i PL nuk kurseu akuzat ndaj organeve të drejtësisë duke e konsideruar procesin ndaj tij si totalisht të rremë.

“Nuk jam unë në pozita të pabarabarta, por ata. Me shpifje dhe gënjeshtra, me kallëzues të rremë, një proces i turpshëm kundër shtetit shqiptar, jo kundër Ilir Metës. Ju ftoj nga sot deri në momentin e fundit, ju ftojë të ndiqni dhe transmetoni live të gjithë procesin. Ju garantoj se mbaj përgjegjësi për çdo veprim, akt dhe sjellje timen”- u shpreh Meta. Versus.al