Një ditë pas protestës së tensionuar në Zvërnec dhe pamjeve që shkaktuan reagime të forta publike, teli me gjemba i vendosur mbi rrethimin e kantierit ku po zhvillohen punimet është hequr këtë të diel.

Lëvizja vjen pas përplasjeve mes protestuesve dhe forcave të sigurisë private, në një ngjarje që riktheu në qendër të debatit projektin e ndërtimit në zonën e mbrojtur të Zvërnecit. Për shumë prej protestuesve, heqja e telit me gjemba shihet si shenja e dytë e një tërheqjeje përballë presionit qytetar dhe reagimit të fortë publik, pas tërheqjes që pati një ditë më parë Policia e Shtetit përballë protestës e reagimeve të palëve në vendngjarje.

Ndërkohë, zhvillimet nuk janë ndalur vetëm te kantieri. Policia ka arrestuar rojën private Gerald Biba, i cili u filmua gjatë incidentit ku një protestues u godit dhe më pas u tërhoq me forcë nga zona e protestës.

32-vjeçari akuzohet për veprat penale “Heqja e paligjshme e lirisë” dhe “Plagosja e lehtë me dashje”. Sipas policisë, ai ka goditur me grusht një qytetar dhe më pas, në bashkëpunim me dy persona të tjerë të proceduar penalisht, e ka tërhequr me forcë, duke i shkaktuar dëmtime trupore.

Ngjarja ka sjellë edhe reagimin e ministrit të Punëve të Brendshme, Besfort Lamallari, i cili ka dënuar jo vetëm sjelljen e rojeve private, por edhe qëndrimin e forcave të policisë të pranishme në vendngjarje.

Sipas ministrit, e papranueshme nuk ishte vetëm dhuna e ushtruar ndaj protestuesit, por edhe indiferenca e pajustifikueshme e efektivëve që ndodheshin aty dhe nuk ndërhynë për të parandaluar incidentin.

Pamjet e protestuesit që tërhiqej zvarrë mes turmës kanë shkaktuar zemërim të madh në opinionin publik dhe kanë shtuar presionin ndaj institucioneve për të hetuar përgjegjësit dhe për të garantuar respektimin e të drejtës së qytetarëve për të protestuar.

Ndërsa protestuesit kërkojnë anulimin e projektit dhe transparencë mbi çështjet e pronësisë në zonë, heqja e telit me gjemba dhe arrestimi i rojës private po interpretohen si pasojat e para konkrete të reagimit qytetar që shpërtheu në Zvërnec.

Qytetarë të shumtë janë mbledhur pasditen e sotme në Tiranë në një protestë kundër ndërtimeve në zonat e mbrojtura dhe projekteve që, sipas tyre, rrezikojnë pasuritë natyrore të vendit.

Tubimi nisi fillimisht përpara Drejtorisë së Policisë së Tiranës, ku protestuesit shprehën pakënaqësitë e tyre lidhur me zhvillimet e fundit në disa zona të mbrojtura.

Më pas, ata marshuan drejt Ministrisë së Brendshme, ndërsa protesta vijoi përpara godinës së Kryeministrisë.

Me pankarta në duar dhe thirrje të shumta, qytetarët kërkuan ndalimin e projekteve që prekin mjedisin dhe hapësirat e mbrojtura. “Shqipëria e shqiptarëve”, “Shqipëria nuk shitet”, “Duam dorëheqje” dhe “Anuloni projektin” ishin disa nga sloganet që dominuan protestën.

Protestuesit mbushën sheshin përpara Kryeministrisë, duke kërkuar më shumë transparencë dhe përgjegjësi nga institucionet shtetërore për çdo projekt që zhvillohet në zona me rëndësi të veçantë natyrore dhe mjedisore.

Protestuesit kërkuan anulimin e projekteve që prekin mjedisin dhe zonat e mbrojtura, ligjit për investimet strategjike dhe paketen e maleve, duke bërë thirrje për dorëheqje dhe mbrojtjen e pasurive natyrore të vendit.

Organizatorët theksuan se protestat do të vijojnë edhe në ditët në vazhdim nëse kërkesat e tyre nuk merren parasysh, ndërsa apeluan për mbrojtjen e trashëgimisë natyrore dhe interesit publik.

Këngëtari Luiz Ejlli ka reaguar përmes një postimi në rrjetet sociale lidhur me mënyrën se si, sipas tij, trajtohen në mënyrë të ndryshme ngjarje të ngjashme në vende të ndryshme të Shqipërisë.

Ai thekson se nuk ka asgjë kundër atyre që reagojnë për ngjarjet në Zvërnec, duke vlerësuar madje se një reagim i tillë është i drejtë dhe i nevojshëm. Megjithatë, sipas tij, problematike mbetet fakti që reagimet publike nuk ndjekin të njëjtin standard për situata të ngjashme.

“Problemi im është kur reagohet vetëm për një rast dhe jo për raste të tjera të ngjashme,” thekson Ejlli, duke sjellë si shembull edhe situatën në Rrjoll, ku sipas tij ka pasur tensione dhe përplasje për javë të tëra pa një reagim të ngjashëm publik.

Ai ngrit pyetjen nëse ekziston një standard i dyfishtë në mënyrën se si trajtohen çështjet publike, duke theksuar se në disa raste reagimet janë të menjëhershme, ndërsa në të tjera mungojnë plotësisht.

Sipas Ejllit, çështja nuk lidhet me vendin apo individët e përfshirë, por me parimin e barazisë në reagim dhe trajtim publik. Ai nënvizon se, nëse vendoset të flitet për çështje publike, atëherë kjo duhet bërë me të njëjtën ndjeshmëri dhe standard për të gjithë.

“Shqipëria nuk mund të ndahet në çështje që meritojnë reagim dhe në çështje që nuk e meritojnë,” shkruan ai, duke shtuar se parimet vlejnë vetëm kur zbatohen në mënyrë të barabartë, pavarësisht vendit, emrit apo interesave të përfshira.

Deklarata e tij ka ngjallur diskutime në rrjet, duke u interpretuar si një thirrje për më shumë konsistencë dhe paanshmëri në reagimet publike ndaj çështjeve sociale dhe konfliktuale në vend.

“Ku është ndryshimi mes Rrjollit dhe Zvërnecit? Ose reagojmë për të gjithë, ose po përdorim standarde të dyfishta”, shkruan ai.

Dhe pikërisht këtu qëndron problemi më i madh.

Një protestë është duke u zhvilluar në Tiranë, pas përplasjeve të fundit të raportuara në zonën e Zvërnecit, ku qindra qytetarë dhe aktivistë janë mbledhur për të shprehur pakënaqësinë e tyre dhe për të kërkuar transparencë mbi ngjarjet.

Protesta fillimisht nisi përballë godinës së Drejtorisë së Policisë së Qarkut Tiranë dhe më pas protestuesit u drejtuan paqësisht përballe godinës së Ministrisë së Brendshme

Protestuesit kërkuan hetim të plotë mbi incidentet dhe identifikimin e përgjegjësive për përplasjet e ndodhura në terren.

Sipas tyre, përdorimi i forcës ndaj protestuesve dhe përshkallëzimi i situatës në Zvërnec përbën një shqetësim serioz për të drejtat e qytetarëve dhe lirinë e tubimit.

Gjatë protestës u dëgjuan thirrje për drejtësi, mbrojtje të aktivistëve dhe ndalje të çdo forme dhune ndaj pjesëmarrësve në tubime publike. Disa nga folësit kërkuan gjithashtu ndërhyrje institucionale për të garantuar hetim të pavarur mbi ngjarjet.

Më tej protestuesit u drejtuan drejt Kryemisnitrisë, ndërsa rrugës buçiste thirrja: "Bashkohuni me ne, bashkohuni me ne" 

Autoritetet deri tani nuk kanë dhënë një reagim mbi protestën, ndërsa situata është mbajtur nën monitorim nga forcat e rendit për të shmangur incidente të mundshme.

Protesta vjen në një klimë të tensionuar pas zhvillimeve në Zvërnec, të cilat kanë ngjallur debat të gjerë publik dhe reagime të shumta në rrjetet sociale dhe opinionin publik.

Media greke Protothema ka bërë të ditur këtë të diel se një shtetas me origjinë greke (nga komuniteti i minoritetit grek) u plagos gjatë incidenteve të rënda që ndodhën dje, të shtunën, në Zvërnec të Shqipërisë, gjatë protestës së banorëve kundër ndërtimit të një resorti turistik në një zonë ekologjikisht të ndjeshme.

Ministria e Punëve të Jashtme e Greqisë, në një deklaratë të saj, protestoi pranë autoriteteve në Tiranë duke kërkuar zbardhjen e plotë të ngjarjes dhe vënien para përgjegjësisë të personave përgjegjës. Megjithatë, ajo vlerësoi edhe “reagimin e menjëhershëm të autoriteteve shqiptare” lidhur me rastin.

Athina shprehu njëkohësisht shqetësimin e saj të fortë për incidentet dhe kujtoi me theks se respektimi i acquis communautaire (legjislacionit dhe standardeve të Bashkimit Europian) përbën një kusht të domosdoshëm për procesin e integrimit të Shqipërisë në BE.

Deklarata e Ministrisë së Punëve të Jashtme të Greqisë

“Ministria e Punëve të Jashtme shpreh shqetësimin e saj të thellë për incidentet e ndodhura dje, më 30 maj 2026, në Zvërnec të Shqipërisë, gjatë një proteste të banorëve për të drejtat e tyre pronësore, mes të cilëve ndodhej edhe një shtetas grek që mbeti i plagosur. Ambasada e Greqisë në Tiranë ndërmori menjëherë të gjitha veprimet e nevojshme për t’i ofruar atij çdo ndihmë të nevojshme konsullore dhe mjekësore.

Njëkohësisht, Ambasada e Greqisë në Tiranë po zhvillon kontaktet e nevojshme me palën shqiptare, duke kërkuar zbardhjen e plotë të incidentit dhe vënien para përgjegjësisë të personave përgjegjës. Në këtë kuadër, ne kemi marrë në konsideratë reagimin e parë të autoriteteve shqiptare.

Theksojmë nevojën për respektimin e plotë të shtetit të së drejtës, përfshirë mbrojtjen e të drejtave dhe pronave të anëtarëve të Minoritetit Kombëtar Grek, si dhe rëndësinë e mbrojtjes efektive të zonave të mbrojtura mjedisore, në kuadër të përafrimit me acquis communautaire të Bashkimit Europian, respektimi i të cilit përbën një parakusht për përparimin e procesit të anëtarësimit.”

Reagime kundër kompleksit turistik
Një protestë u zhvillua dje në Zvërnec të Shqipërisë nga kundërshtarët e ndërtimit të një kompleksi të madh turistik në zonën e Dalanit. Protestuesit u përplasën me persona që ata i identifikuan si pjesëtarë të sigurisë private të kompanive që kanë marrë përsipër ndërtimin e resortit turistik.

Protestuesit theksojnë nevojën për mbrojtjen e mjedisit natyror dhe kundërshtojnë planet e ndërtimit në një nga zonat më të ndjeshme ekologjikisht të bregdetit shqiptar. Sipas tyre, projekti rrezikon biodiversitetin e zonës Pishë Poro–Nartë. Ata kërkojnë ndërprerjen e menjëhershme të punimeve dhe rishqyrtimin e projektit.

Zhvillimi i projektit raportohet se i është besuar kompanisë Zvërnec South Adriatic Development, e cila lidhet me struktura ndërkombëtare investimi ku përfshihen Jared Kushner, Ivanka Trump dhe biznesmenë nga Katari.

Gjatë protestës shpërthyen incidente mes protestuesve dhe disa personave të veshur me rroba civile, kapele dhe syze. Protestuesit pretenduan se këta persona ishin pjesë e sigurisë private të projektit.

Madje, në videot e publikuara në rrjetet sociale, shihet një protestues duke u tërhequr zvarrë në tokë nga këta persona.

Pas një valë deklaratash e qëndrimesh që vijnë një ditë, pasi qytetarët teksa protestonin kundër projektit që pritet të ndërtohet në Zvërnec u dhunuan egërsisht nga rojet private që ruanin këtë territor, ka reaguar dhe kryeministri Edi Rama.

Në një postim në rrjetin social X, Rama shkruan se ai do të flasë nesër (1 qershor), live në orën 10:00 për një projekt të jashtëzakonshëm për Shqipërinë, për të cilin punohet prej disa vitesh tanimë dhe i cili nuk ka asnjë lidhje me disa të pavërteta të mëdha, që janë hedhur në qarkullim ditët e fundit.

"Nesër e kam radhën unë për të folur për një projekt të jashtëzakonshëm për Shqipërinë, për të cilin punohet prej disa vitesh tanimë dhe i cili nuk ka asnjë lidhje me disa të pavërteta të mëdha, që janë hedhur në qarkullim ditët e fundit.

Ndërkohë e përgëzoj lidershipin e Policisë së Shtetit për reagimin e shpejtë e të saktë, qoftë ndaj atij grushti muskujsh pa tru me statusin e rojeve private të sigurisë, qoftë ndaj drejtuesve vendorë të policisë së Vlorës.

Qasja e re e tolerancës zero ndaj çdo uniforme blu që cënon besimin e publikut, është e duhura.

Për vetë projektin dhe të vërtetat e të pavërtetat rreth tij, më shumë nesër në 10.00. Live për të gjithë të interesuarit natyrisht", shkruan Rama. Versus.al

Në vazhdën e qëndrimeve zyrtare kundër dhunës së paprecedent që u ushtrua ndaj protestuesve në Zvërnec, ka reaguar dhe ministri i Punëve të Brendshme, Besfort Lamallari.

Përmes një statusi në rrjetet sociale, Lamallari e ka cilësuar të papranueshme indiferencën e policisë.

“Uniformat blu janë dhe duhet të jenë në çdo rast, garante të rendit ligjor, ku mbrojtja e pronës publike apo private janë një pjesë thelbësore. Por po ashtu ato duhet të garantojnë edhe  pacënueshmërinë e besimit të qytetarëve tek uniforma e policisë, prandaj çdo devijim nga këto parime do të goditet përmes bashkëpunimit të ngushtë mes strukturave drejtuese të policisë dhe të Agjencisë së Mbikqyrjes Policore”, shkruan Lamallari.

Ministri i Brendshëm ka kërkuar që për rojet e kompanisë private të sigurisë që dhunuan qytetarët, të nisë hetimi dhe të marrin ndëshkimin e duhur

"Rojet private të pronës nuk kanë asnjë të drejtë të përdorin forcë ndaj askujt dhe jo vetëm ata si individë duhet të ndiqen penalisht, siç po ndiqen po edhe për kompaninë e tyre  hetimi administrativ për paaftësi totale në ushtrimin e aktivitetit të autorizuar, duhet të mbyllet sa më parë të jetë e mundur",- shkruan Lamallari.

Reagimi i plotë i ministrit Besfort Lamallari

1. Projekti i Zvërnecit lidhet me një tokë tërësisht private dhe qeveria shqiptare as ka falur tokë, as ka tokë për të falur - jo vetëm sepse ne nuk i kemi falur ndonjëherë tokë askujt, po edhe sepse në këtë rast ajo pronë u është kthyer pronarëve dhe është regjistruar në hipotekë, vite përpara sesa ne të vinim në qeveri.

2. Po nëse prona është private, rojet private të pronës nuk kanë asnjë të drejtë të përdorin forcë ndaj askujt dhe jo vetëm ata si individë duhet të ndiqen penalisht, siç po ndiqen po edhe për kompaninë e tyre  hetimi administrativ për paaftësi totale në ushtrimin e aktivitetit të autorizuar, duhet të mbyllet sa më parë të jetë e mundur.

3. E përshëndes reagimin e shpejtë të drejtorisë së përgjithshme të Policisë së Shtetit për pezullimin e drejtuesve vendorë dhe vënien nën hetim të zinxhirit të komandimit, sepse nuk ishte e papranueshme vetëm sjellja skandaloze e rojeve private, po edhe indiferenca e pajustifikueshme e policisë së pranishme në vend.

Goditja brenda radhëve të Policisë së Shtetit, që nisi në Sarandë dhe ka vazhduar në Vlorë, do të jetë një konstante e punës së strukturave tona në këtë kapitull të ri të drejtimit të tyre. Uniformat blu janë dhe duhet të jenë në çdo rast, garante të rendit ligjor, ku mbrojtja e pronës publike apo private janë një pjesë thelbësore. Por po ashtu ato duhet të garantojnë edhe  pacënueshmërinë e besimit të qytetarëve tek uniforma e policisë, prandaj çdo devijim nga këto parime do të goditet përmes bashkëpunimit të ngushtë mes strukturave drejtuese të policisë dhe të Agjencisë së Mbikqyrjes Policore. Versus.al

Dhuna e egër e ushtruar ndaj një qytetari në Zvërnec ditën e djeshme shkaktoi valë reagimesh kundër personave përgjegjës, të cilët ishin roje private të kompanisë së sigurimit “Major Security”.

Në media kanë qarkulluar prej ditës së shtunë, pamje që kanë shkaktuar revoltë në opinionin publik ku persona të maskuar kanë tërhequr zvarrë dhe kanë dhunuar protestuesit, të cilët kanë dalë për të kundërshtuar ndërtimin e resortit gjigand turistik nga kompania “Zvërnec South Adriatic Development”, lidhur me investimin e dhëndrit të Donald Trump, Jared Kushner.

Po kush janë autorët e kësaj pamje të rëndë që u bë virale menjëherë duke nxjerrë në pah egërsinë dhe një sjellje të paprecedent ndaj një qytetari të pafajshëm që po protestonte në të drejtën e tij jashtë rrethimit të hapësirës e cila thuhet se është private.

Një prej tyre është Gazment Vathi, një ish-punonjës i policisë bashkiake, ku  8 vite më parë, kur ai ushtronte detyrën si punonjës i Policisë Bashkiake, emri i tij u diskutua pas një përplasje me një shitës ambulant kokoshkash.

Pamjet e asaj kohe ngjallën debat publik dhe reagime të shumta, pasi shumë qytetarë e konsideruan veprimin si të padrejtë ndaj një personi që siguronte të ardhurat e familjes së tij përmes shitjes ambulante.

Në videot e shpërndara nga protesta e pretenduesve të pronave në Zvërnec, ai shfaqet mes punonjësve të sigurisë private të kompanisë “Major Security”, të cilët u përfshinë në përplasjet me protestuesit.

Po ashtu një tjetër roje i kësaj kompanie, që është përfshirë në episodet e dhunës është identifikuar si Gerald Biba (Geri), i njohur si ish-truproja i reperit Noizy.

Pamjet e publikuara në rrjet tregojnë momentet e tensionit, ndërsa qytetarët pretendojnë se ai ka goditur protestuesit me gurë gjatë përplasjes. Emri i tij është bërë menjëherë objekt diskutimi në rrjetet sociale për shkak të profilit të njohur publik. Versus.al

Policia e Shtetit ka arrestuar një punonjës të një shoqërie private sigurie, pasi dyshohet se ka ushtruar dhunë fizike ndaj një qytetari gjatë tubimit të zhvilluar më 30 maj në zonën e Portonovës, në fshatin Zvërnec.

Sipas njoftimit zyrtar, veprimet hetimore nisën menjëherë pas publikimit të pamjeve filmike ku shfaqej punonjësi i sigurisë duke goditur me grusht shtetasin me iniciale E. S.

Me urdhër të Drejtorit të Përgjithshëm të Policisë së Shtetit, u ngrit një grup i posaçëm hetimor për të analizuar dhe dokumentuar të gjitha ngjarjet e ndodhura gjatë protestës së banorëve të zonës.

Nga hetimet paraprake u identifikua dhe u shoqërua shtetasi Gerald Biba, 32 vjeç, banues në Durrës i cili njihet si ish-truproja i reperit të njohur Noizy.

Në përfundim të veprimeve të para procedurale, ai u arrestua në flagrancë si i dyshuar për veprat penale “Heqja e paligjshme e lirisë” dhe “Plagosja e lehtë me dashje”.

Sipas Policisë, G. B. fillimisht ka goditur me grusht shtetasin E. S. dhe më pas, në bashkëpunim me shtetasit A. G. dhe G. V., të cilët janë proceduar penalisht, e kanë tërhequr me forcë drejt zonës së rezervuar për rojet e sigurisë, duke i shkaktuar dëmtime të lehta trupore.

Ndërkohë, krahas hetimeve penale, Drejtori i Përgjithshëm i Policisë ka urdhëruar edhe nisjen e një hetimi disiplinor nga Drejtoria e Standardeve Profesionale për të gjithë zinxhirin komandues të Drejtorisë Vendore të Policisë Vlorë. Hetimi do të fokusohet në masat e marra dhe mënyrën e menaxhimit të tubimit të zhvilluar në Portonovë.

Policia e Shtetit deklaron se mbetet e angazhuar për respektimin e të drejtave dhe lirive themelore të qytetarëve, garantimin e sigurisë publike dhe ndëshkimin e çdo shkeljeje apo abuzimi me detyrën.

Njoftimi i plotë

Menjëherë pas publikimit të pamjeve filmike ku shfaqet një punonjës i shoqërisë private të sigurisë duke goditur me grusht shtetasin E. S., Drejtori i Përgjithshëm i Policisë së Shtetit urdhëroi ngritjen e një grupi të posaçëm hetimor për të analizuar dhe hetuar të gjitha veprimet e ndodhura gjatë tubimit të zhvilluar më datë 30.05.2026 nga banorë të fshatit Zvërnec, në vendin e quajtur “Portonovë”.

Në vijim të veprimeve hetimore, u bë identifikimi dhe shoqërimi i punonjësit të shoqërisë private të sigurisë, shtetasit G. B., 32 vjeç, banues në Durrës, i cili, në përfundim të veprimeve të para hetimore, u arrestua në flagrancë, i dyshuar për veprat penale "Heqja e paligjshme e lirisë" dhe "Plagosja e lehtë me dashje".

Ky shtetas ka goditur me grusht shtetasin E. S. dhe më pas, në bashkëpunim me shtetasit A. G. dhe G. V. (të dy të proceduar penalisht), e kanë tërhequr me forcë drejt vendit të rezervuar për rojet, duke i shkaktuar dëmtime të lehta trupore.

Ndërkohë, paralelisht me veprimet hetimore, Drejtori i Përgjithshëm ka urdhëruar Drejtorinë e Standardeve Profesionale në Policinë e Shtetit për nisjen e menjëhershme të hetimit disiplinor për të gjithë zinxhirin komandues të DVP Vlorë, në lidhje me masat dhe menaxhimin e tubimit të zhvilluar ditën e djeshme.

Policia e Shtetit është e vendosur të respektojë të drejtat dhe liritë themelore të qytetarëve, të garantojë sigurinë e jetës dhe të pronës, si dhe të ndëshkojë çdo punonjës policie që neglizhon detyrën apo abuzon me të.

Menjëherë pas publikimit të pamjeve filmike ku shfaqet një punonjës i shoqërisë private të sigurisë duke goditur me grusht shtetasin E. S., Drejtori i Përgjithshëm i Policisë së Shtetit urdhëroi ngritjen e një grupi të posaçëm hetimor për të analizuar dhe hetuar të gjitha veprimet e ndodhura gjatë tubimit të zhvilluar më datë 30.05.2026 nga banorë të fshatit Zvërnec, në vendin e quajtur “Portonovë”.

Në vijim të veprimeve hetimore, u bë identifikimi dhe shoqërimi i punonjësit të shoqërisë private të sigurisë, shtetasit G. B., 32 vjeç, banues në Durrës, i cili, në përfundim të veprimeve të para hetimore, u arrestua në flagrancë, i dyshuar për veprat penale "Heqja e paligjshme e lirisë" dhe "Plagosja e lehtë me dashje".

Ky shtetas ka goditur me grusht shtetasin E. S. dhe më pas, në bashkëpunim me shtetasit A. G. dhe G. V. (të dy të proceduar penalisht), e kanë tërhequr me forcë drejt vendit të rezervuar për rojet, duke i shkaktuar dëmtime të lehta trupore.

Ndërkohë, paralelisht me veprimet hetimore, Drejtori i Përgjithshëm ka urdhëruar Drejtorinë e Standardeve Profesionale në Policinë e Shtetit për nisjen e menjëhershme të hetimit disiplinor për të gjithë zinxhirin komandues të DVP Vlorë, në lidhje me masat dhe menaxhimin e tubimit të zhvilluar ditën e djeshme.

Policia e Shtetit është e vendosur të respektojë të drejtat dhe liritë themelore të qytetarëve, të garantojë sigurinë e jetës dhe të pronës, si dhe të ndëshkojë çdo punonjës policie që neglizhon detyrën apo abuzon me të.Versus.al