Në Pallatin e Kulturës në Tetovë, mes dhimbjes dhe heshtjes së rëndë, familjarë, miq dhe adhurues të muzikës shqiptare u mblodhën sot për t’i dhënë lamtumirën e fundit këngëtarit Shpat Kasapi. Mes tyre, një nga figurat më të prekura ishte motra e tij, Jehona, e cila nuk mundi t’i përmbante lotët ndërsa përshëndeste vëllain e dashur.

E mbështjellë me zi dhe emocione të forta, Jehona mbajti një fjalim të thellë e prekës, duke treguar dashurinë e jashtëzakonshme që kishte për vëllain dhe se sa shumë Shpati do t’i mungojë familjes.

“Sot, me zemër të thyer, jemi mbledhur për t’i dhënë lamtumirën e fundit vëllait tim. Është e vështirë të gjej fjalët që përshkruajnë dhimbjen që ndiej… Shpat, shpirti i motrës, ti linde me yll në ballë. Ishe një njeri i mirë, i ndjeshëm, që e dëgjoje dhe e kuptoje dhimbjen e të tjerëve me zemër të madhe”, u shpreh ajo mes lotëve.

Në fjalimet e saj, Jehona tregoi edhe anën e butë dhe njerëzore të Shpatit, duke rikujtuar shpesh se sa shumë ai i donte fëmijët dhe të moshuarit. “Buzëqeshja ishte sinonimi yt”, tha ajo, duke e përshkruar si një njeri plot dritë, gëzim dhe dashuri.

Më prekëse se çdo fjalë ishte premtimi që Jehona i bëri vëllait të saj të ndjerë: do të përmbushë amanetin e Shpatit për të birin, Roelin, duke e marrë përsipër mbrojtjen dhe kujdesin për të, ashtu siç do ta dëshironte vetë ai.

Mes ngushëllimeve dhe duartrokitjeve të buta në shenjë nderimi, fjalët e saj u kthyen në një nga momentet më të dhimbshme të ceremonisë, duke prekur thellë të gjithë të pranishmit.

Ceremonia mortore e Shpat Kasapit sot në Tetovë ishte një prej skenave më të trishtuara që ka përjetuar publiku shqiptar. Në qendër të dhimbjes që mbushi Pallatin e Kulturës dhe më pas varrezat e qytetit, qëndronin dy gra: nëna që e rriti e vetme, dhe bashkëshortja e tij, Selvija, në krahët e së cilës Shpati dha frymën e fundit.

NËNA QË E RRITI E VETME, TANI I JEP LAMTUMIRËN E FUNDIT

Nëna e këngëtarit, një grua e thyer por e fortë, qëndronte mes njerëzve me dhimbjen e një nënë që e ka luftuar jetën dorë për dore me të birin. Shpati ishte rritur pa baba dhe ajo kishte qenë e vetmja shtyllë, ajo që mbajti peshën e jetës dhe ëndrrave të tij.

Sot, ajo i dha lamtumirën e fundit djalit që e kishte rritur me sakrifica dhe mund, djalit që ishte bërë simbol i suksesit dhe gëzimit, por që u shua shumë herët.

Lotët e saj, të heshtur dhe të pafund, tronditën të pranishmit më shumë se çdo fjalë. Çdo njeri pranë saj dukej i pafuqishëm përballë asaj dhimbjeje që vetëm një nënë mund ta mbajë në gjoks.

SELVIJA, PRANË DERI NË FRYMËN E FUNDIT

Bashkëshortja e këngëtarit, Selvija, ishte figurë tjetër qendrore e kësaj dite të zezë. E mbështjellë me dhimbje, ajo mbante në duar fotografinë e Shpatit, ndërsa fytyra i dridhej nga lotët.

Të gjithë u prekën thellë nga fakti se Shpati ndërroi jetë pikërisht në krahët e saj, gjatë një momenti të zakonshëm familjar, pa pritur dhe pa mundur të shpëtohej. Ajo ishte aty me të, duke u bërë dëshmitarja e fundit e jetës së tij.

Në ceremoni, Selvija i përqafoi një nga një të gjithë ata që i afroheshin, por nuk arrinte t’i ndalte lotët, ndërsa mbante duart e ftohta të nënës së Shpatit, të dyja bashkë, të bashkuara nga dhimbja më e madhe që mund të njohë jeta.

Shpat Kasapi, i cili u nda papritur nga jeta në moshën 40-vjeçare, la pas një boshllëk që sot u ndje në çdo fytyrë, çdo zë, çdo përqafim. Por më shumë se askund tjetër, boshllëku u pa në dy gra që e donin më shumë se kushdo: nëna që i dha jetën dhe bashkëshortja që ishte pranë tij deri në fund.

Këngëtarja Dafina Zeqiri ishte mes të pranishmëve në ceremoninë e homazheve për Shpat Kasapin, duke shoqëruar bashkëshortin e saj, Kreshnik Gjergjin. Ajo dukej thellësisht e prekur, ndërsa lotët i rridhnin pa mundur t’i ndalte, duke ndarë dhimbjen për humbjen e papritur të mikut dhe kolegut të saj të dashur.

Gjatë ceremonisë, Dafina iu afrua me ngrohtësi familjarëve të Kasapit, i përqafoi dhe u dha mbështetje në këtë moment të rëndë, duke ndjerë së bashku me ta boshllëkun që la pas Shpati në zemrat e të gjithëve.

Humbja e papritur e Shpat Kasapit ka tronditur thellë jo vetëm familjen dhe miqtë, por gjithë skenën muzikore shqiptare dhe fansat, të cilët vazhdojnë të ndajnë dhimbjen për ikjen e një prej zërave më të dashur dhe të paharrueshëm të vendit.

Ceremonia mortore për këngëtarin e ndjerë Shpat Kasapi ka nisur sot në Pallatin e Kulturës në Tetovë, ku familjarë, miq, kolegë dhe adhurues të muzikës janë mbledhur për t’i dhënë lamtumirën e fundit një prej zërave më të dashur të skenës shqiptare.

Atmosfera është e mbushur me trishtim dhe dhimbje, ndërsa secili i bën homazhe artistit që u nda papritur nga jeta në moshën 40-vjeçare, duke lënë pas një boshllëk të madh në muzikën shqiptare dhe në zemrat e publikut.

Mes të pranishmëve janë parë figura të njohura të skenës, përfshirë Bleron, Adelina Tahirin, Big Mamën dhe Dafina Zeqirin, të cilët kanë ardhur për të nderuar kontributin e Shpatit dhe për të ndarë kujtime të veçanta me të.

Momente të thella emocioni janë ndjerë kur të pranishmit kanë kujtuar talentin, buzëqeshjen dhe pasionin për muzikën që e karakterizonte.

Ceremonia do të vazhdojë drejt varrezave të qytetit, ku Shpat Kasapi do të prehet përgjithmonë, ndërsa ky moment shërben si një homazh i dhimbshëm dhe i përjetshëm për jetën, karrierën dhe ndikimin e tij në muzikën shqiptare.

Këngëtari i njohur Shpat Kasapi ndërroi jetë në moshën 40-vjeçare si pasojë e një ataku në zemër. Ditën e sotme, ai do të përcillet për në banesën e fundit, ndërkohë që homazhet janë caktuar të zhvillohen në Pallatin e Kulturës në Tetovë në orën 11:00.

Mes të pranishmëve, një imazh që preku të gjithë ishte ai i Big Mama-s, e cila u shfaq thellësisht e prekur, me lot në sy gjatë ceremonisë. E veshur me rroba të zeza, ajo qëndroi pranë të tjerëve, duke marrë ngushëllimet dhe mbajtur një shami në dorë, ndërsa emocionet e tradhëtuan, duke u shkrehur disa herë në lot.

Në dorë, Big Mama mbante edhe një fotografi bardh e zi të Shpatit, një simbol i kujtimit të përjetshëm dhe vendit të veçantë që këngëtari kishte në zemrën e saj. Miqësia e tyre e ngushtë daton që prej vitit 1997, kur nisën bashkëpunimet muzikore, shpesh në programe festive dhe në skena të ndryshme. Pak ditë para ndarjes së tij nga jeta, Shpati kishte shprehur dëshirën që ata të këndonin së bashku këngën “Sajzeza”, një moment që Big Mama e mban mend me mall.

Gjatë karrierës, Shpat Kasapi mori pjesë në festivale të njohura dhe realizoi bashkëpunime muzikore që lanë gjurmë te publiku, duke ruajtur popullaritetin deri në vitet e fundit. 

Në Tetovë sot i jepet lamtumirën e fundit këngëtarit të njohur Shpat Kasapi, i cili u nda nga jeta në mënyrë të papritur në moshën 40-vjeçare pas një ataku kardiak. Lajmi i hidhur ka prekur thellë komunitetin artistik dhe publikun në gjithë trevat shqiptare, ndërsa qyteti pritet të mbledhë sot një numër të madh adhuruesish dhe bashkëqytetarësh për t’i bërë nderimet e fundit artistit.

Sipas njoftimit të bërë publik nga familjarët, homazhet për Shpat Kasapin do të zhvillohen nga ora 12:00 në Pallatin e Kulturës në Tetovë, ndërsa ceremonia e varrimit do të mbahet në orën 14:00 në varrezat e qytetit.

Në deklaratën e familjes, e cila është publikuar me dhimbje të thellë, theksohet se Kasapi ishte njeri i dashur e i afërt me të gjithë ata që e rrethonin:

“Me hidhërim të thellë kumtojmë ndarjen nga jeta të birit, bashkëshortit, babait, vëllait dhe mikut tonë të dashur. Shpati ishte një zemër e pastër, një shpirt i gëzueshëm që jetonte me këngë në buzë dhe me dritë në sy. Ai përhapte vetëm dashuri e mirësi… Largimi i tij i papritur na ka thyer zemrat.”

Këngëtari, i njohur për zërin e tij të butë dhe stilin karakteristik që e bëri të dashur për publikun për gati dy dekada, ka qenë një nga figurat më të pëlqyera të skenës muzikore shqiptare në Maqedoninë e Veriut.

Me këngë të suksesshme dhe një prani të ngrohtë në skenë, Kasapi arriti të krijojë lidhje të fortë me fansat, të cilët sot ndajnë të njëjtën dhimbje me familjarët.

Ndarja e tij e papritur ka shkaktuar reagime të shumta në rrjetet sociale, ku kolegë, artistë dhe qytetarë kujtojnë momentet që ai u ka dhuruar me muzikën e tij, duke e përshkruar si një njeri të qetë, pozitiv dhe gjithmonë të gatshëm për të sjellë gëzim.

Sot, Tetova do ta përcjellë në prehjen e fundit artistin që la gjurmë në zemrat e shumë njerëzve. Shpat Kasapi do të kujtohet për krijimtarinë e tij muzikore, karakterin e tij të butë dhe dashurinë që tregoi gjatë gjithë jetës ndaj publikut.

U prefsh në paqe, Shpat!